भांगरभूंय | प्रतिनिधी
नवी दिल्ली, खबरां संस्था : तरणाट्यां मदीं मरण येवपाचें प्रमाण वाडतूच आसा. हाका कारण काळजाचें दुयेंस आनी इबाडिल्ली जिणेशैली हें अभ्यासांतल्यान मुखार आयलां. नवी दिल्लींत एम्सान हे विशीं केल्ल्या अभ्यासांत १८ ते ४५ पिरायेच्या तरणाट्यांक अचकीत येवपी मरणा फाटलें काळजाचें दुयेंस हेंच मुखेल कारण आशिल्ल्याचें नोंद केलें.
मे, २०२३ ते एप्रील, २०२४ हाचे मजगतीं इंडियन कावन्सील ऑफ मेडिकल रिसर्च (आयसीएमआर) खाला केल्ल्या अभ्यासांत पोस्टमार्टमांच्या नोंदीची तपासणी केली. हातूंत अचकीत मरण आयिल्ल्यां मदलीं ८ टक्के प्रकरणां ह्या रिपोर्टा खाला येतात. तातूंत ५७ टक्के मरणां तरणाट्यांचीं आशिल्लीं आनी सरासरी पिराय ३३.६ वर्सां इतलीं आशिल्लीं. तुळेंत बायलां परस दादल्यांचें प्रमाण खूब आशिल्लें.
४२.६ टक्के मरण काळजाच्या दुयेंसान
अभ्यासा प्रमाण, अचकीत आयिल्ल्या मरणांचीं मुखेल कारणां दिसून आयल्यांत तीं म्हळ्यार, काळजाचें दुयेंस (४२.६ टक्के), स्वासाचें दुयेंस (२१.३ टक्के) जाल्यार (२१.३ टक्के) मरणाचीं कारणां स्पश्ट जावंक नात. नमूद करपा सारकें म्हणल्यार कोवीड १९ चो सरळ संबंद दिसून येवंक नाशिल्ल्याचें अभ्यासांत स्पश्ट जालां. तज्ञांच्या म्हणण्या प्रमाण, तरणाट्यां मदीं सोरो पियेवप, सिगार ओडप, अपूर्ण न्हिद, सुशेगाद जिणेशैली, ताण अशे तरेचो सदचे जिणेंतल्यो संवयो धोको थारतात. अभ्यासांत हेंय दिसून आयलां, मरण आयिल्ल्यां मदले ५७ टक्के सिगार ओडपी, जाल्यार ५२ टक्के सोरो पियेवपी आशिल्ले, अशें निदर्शनाक आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
