भांगरभूंय | प्रतिनिधी
नवी दिल्ली, खबरां संस्था: वेंचणूक आयोगान केल्ल्या विशेश पुनरावृत्ती (एसआयआर, सामान्य भाशेंत मतदार पडताळणी) उपरांत मंगळारा पश्चीम बंगाल, राजस्थान, गोंय, लक्षद्वीप आनी पुद्दुचेरीची मसुदो मतदार वळेरी (ड्राफ्ट वोटर लिस्ट) जारी केली. हातूंत वट्ट मतदारांचे वळेरेंत ७.६% उणाव नोंद केलो.
आयोगाचे आंकडेवारी प्रमाण २७ ऑक्टोबराक एसआयआरची घोशणा जाली तेन्ना हीं राज्यां/केंद्रशासीत प्रदेशांनी १३.३५ कोटी मतदार आशिल्ले, जाल्यार मसुदो वळेरेंत हो आंकडो देंवून १२.३३ कोटी जाला. म्हळ्यार १.०२ कोटी नावां काडलीं.
बंगालांत ५८ लाख २० हजार ८९८ मतदारांचीं नांवां कुशीक काडपाक चिन्हांकीत केल्यांत. राजस्थानांत ४१.८५ लाख आनी पुद्दुचेरींत ८५ हजार मतदारांचीं नांवां कुशीक काडल्यांत. तशेंच घराघरांनी वचून म्हायती एकठांय करपाचें काम पुराय जालां. फुडें दावे, हरकती आनी सुनावणेची प्रक्रिया सुरू जातली.
एसआयआरचो दुसरो टप्पो फेब्रुवारी २०२६ मेरेन चलतलो आनी निमाणी मतदार वळेरी १४ फेब्रुवारी २०२६ दिसा जारी करतले. हाचे वांगडा गोंय आनी लक्षद्वीपांतूय आयज मतदार वळेरेचो मसुदो प्रकाशीत करतले.
राजस्थानांत ४१.८५ लाख नांवां रद्द केलीं
राजस्थानांत विशेश सखोल पुनरिक्षणाचे (एसआयआर) मसुदो वळेरेंत ४१.८५ लाख मतदारांचीं नांवां रद्द केल्यांत. मसुदो वळेरे वांगडा हाजीर नाशिल्ल्या, स्थलांतरीत, मरण आयिल्ले आनी पयलींच नोंदणीकृत मतदारांची वळेरी दिल्या. मसुदो मतदार वळेरी वेंचणूक विभागाच्या संकेतथळार आसा.
राजस्थानाचे मुखेल वेंचणूक अधिकारी नवीन महाजन हांणी म्हणलें, ज्या मतदारांचीं नांवां कुशीक दवरल्यांत तांकां आतां कसलीच नोटीस दिवचे ना. जर तांकां आक्षेप आसल्यार तीं कागदपत्रां सादर करून दावो करपाक शकतात. हातूंत कायमस्वरूपी स्थलांतरीत मतदार, मरण आयिल्ले मतदार, हाजीर नाशिल्ले आनी दुबार मतदारांचीं नांवां कुशीक काडल्यांत.
बांगलांत १.३८ लाखां परस चड बनावट वा बोगस मतदार
पश्चीम बंगालांत ५८ लाख २० हजार ८९८ मतदारांचीं नांवां कुशीक काडपाक चिन्हांकीत केल्यांत. हातुंतलीं २४ लाख १६ हजार ८५२ नांवां मरण आयिल्ल्या मतदारांचीं आसात. १९ लाख ८८ हजार ७६ मतदार अशे आसात जे कायमस्वरूपी दुसरे सुवातेर स्थलांतरीत जाल्यात.
हाचे भायर, १२ लाख २० हजार ३८ मतदार बेपत्ता, १ लाख ३८ हजार ३२८ बनावट वा बोगस आनी ५७ हजार ६०४ नावां हेर कारणांक लागून कुशीक काडपाच्या प्रस्तावांत आसात. राज्यांतल्या २९४ विधानसभा क्षेत्रां मदलीं सगल्यांत चड नांवां कोलकाताच्या चौरंगी आनी कोलकाता पोर्ट अश्या क्षेत्रांनी कुशीक काडल्यात.
चौरंगी विधानसभा मतदारसंघांतल्यान ७४,५५३ नांवां कुशीक काडलीं. हांगचे आमदार तृणमूल कॉंग्रेसीची नयना बंद्योपाध्याय आसात. कोलकाता पोर्टांतल्यान वट्ट ६३,७३० नांवां कुशीक काडलीं. हाचें प्रतिनिधित्व ज्येश्ठ मंत्री फिरहाद हकीम करतात. सगल्यांत उणीं नांवां बांकुरा जिल्ह्यांतल्या कोतुलपूरच्यान कुशीक काडलीं. हांगा ५,६७८ नांवां कुशीक काडल्यांत.
गोंय आनी पुद्दुचेरी, लक्षद्वीपची स्थिती
गोंय- ११.८५ लाख मतदारां मदल्या १०.८४ लाख मतदारांनी अर्ज जमा केले. हांगा १ लाखां परस चड नांवां कुशीक काडल्यांत, जातूंत मरण आयिल्लीं, हाजीर नाशिल्लीं, कायमस्वरूपी स्थलांतरित आनी डुप्लिकेट मतदार हांचो आसपाव आसा. उत्तर गोंयांत ४४,६३९ आनी दक्षीण गोंयांत ५५,४०३ नांवां कुशीक काडल्यांत.
पुडुचेरी- सुरवातेचे वळेरेंतल्यान १.०३ लाखां परस चड नांवां कुशीक काडल्यांत. आतां वट्ट मतदार ९.१८ लाख उरल्यात. हांगा सगल्यांत चड नांवां पुडुचेरी जिल्ह्यांतल्यान कुशीक काडल्यार, जाल्यार कराईकल, माहे आनी हातुंततय व्हडा संख्येन मतदार वळेरेंतल्या भायर पडले.
लक्षद्वीप- २७ ऑक्टोबर मेरेन वट्ट ५८ हजार मतदार नोंदणीकृत आशिल्ले. सुरवातेक मतदार वळेरी प्रसिद्ध जाले उपरांत, तांतली ५६,३८४ मतदारांचीं नांवां मतदार वळेरेंत आसपाव आशिल्ल्याचें कळ्ळें. म्हळ्यारूच १,६१६ मतदारांचीं नांवां वळेरेंतल्यान कुशीक काडल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
