भांगरभूंय | प्रतिनिधी
पणजी: गोंय ते नवी दिल्ली विमानांत एके अमेरिकन बायलेचो जीव एके भारतीय बायल दोतोरान वाटयलो. गोंय ते नवी दिल्लीक विमानांतल्यान एक अमेरिकन बायल प्रवास करताली. प्रवासा मजगतीं तिका काळजाचो आताक आयलो. ह्या वेळार त्याच विमानांतल्यान खानापुरची आदली आमदार आनी काँग्रेसीची राष्ट्रीय सरचिटणीस डॉ. अंजली निंबाळकर प्रवास करताली. ते बायलेक बेगोबेग वैजकी मजतीची गरज आशिल्ल्याचें डॉ. निंबाळकर हांच्या लक्षांत आयलें. तिणें कळाव करिनासतना तिका सीपीआर दिवन तिचो जीव वाटयलो.
विमानांतल्या प्रवासा मजगतीं घडिल्लो हो प्रकार खरेंच खुबश्या जाणांक उर्बा दिवपी आसा. वैजकी वेवसायांतल्यान पयस वचून राजकारणांत सक्रीय आसून लेगीत डॉ. अंजली हांणी आपले सेवे खातीर आशिल्लें समर्पण आनी गंभीरपण वळखलें. तिच्या ह्या बेगोबेग केल्ल्या उपचाराक लागून एके बायलेचो जीव वाटवलो. हे गजाली खातीर डॉ. अंजली हांची सगल्याक तोखणाय जातना दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
