भांगरभूंय | प्रतिनिधी
मुख्य वेंचणूक अधिकारी संजय गोयल हांची म्हायती
मसुदो मतदार वळेरी 16 डिसेंबराक करतले जाहीर
15 जानेवारी मेरेन हरकत नोंद करपाक मुजत
भांगरभूंय । प्रतिनिधी
पणजी : गोंयांतल्या मतदारांची विशेश खोलायेन फेरतपासणी (एसआयआर) पुराय जाले उपरांत वट्ट 1 लाख 78 मतदारांचीं नांवां मसुदा वळेरेंतल्यान वगळ्ळीं. 11 डिसेंबराचे निमाणे मेरेन 10 लाख 84 हजार 956 (91.55 टक्के) मतदारांचें एन्युमरेशन फॉर्म एकठांय करून तांचें डिजिटायझेशन जालां. सुमार 1 लाख 82 हजार 855 मतदारांचें (8.45 टक्के) वा तांच्या आवय- बापायचें नांव 2002 च्या मतदार वळेरेंत ना, अश्या मॅपींग जावंक नाशिल्ल्या मतदारां विशीं सुनावणी घेवन निमाणो निर्णय घेतले, अशी म्हायती मुख्य वेंचणूक अधिकारी संजय गोयल हांणी दिली.
शेनवारा पणजे घेतिल्ले पत्रकार परिशदेंत गोयल हांणी सांगलें, फॉर्म परत येवंक नाशिल्ल्या 1 लाख 78 मतदारांचो एएसडीडी हे श्रेणींत आस्पाव केला. तातूंत मरण आयिल्ले, गैरहाजीर, दोन नांवां आसप वा नामो सासणाचो बदलिल्ल्यांचो आस्पाव आसा. 16 डिसेंबराक उजवाडाक येवपी मसुदा वळेरेंत तांचीं नांवां आसचीं नात. अश्या मतदारांचीं नांवां ऑनलायन वा ऑफलायन पद्दतीन जाहीर करतले. तातूंतल्या कोणाक आपलें नांव चुकीचे पद्दतीन काडलां, अशें दिसल्यार तांणी अर्ज 6 भरून दिवप गरजेचें आसा. तशेंच तांकां गरजेच्या कागदपत्रां वरवीं पुरावो दिवचो पडटलो. अश्या व्यक्तींक घोशणापत्र लेगीत दिवचें पडटलें. सगलीं कागदपत्रां योग्य आसत जाल्यार त्या व्यक्तींचीं नांवां निमाणे मतदार वळेरेंत घेतले.
एसएसडीडी श्रेणींतल्यान वगळिल्ल्या नांवां संबंदांत पारदर्शक दवरचे खातीर सगल्या राजकी पक्षांच्या प्रतिनिधींक मतदारसंघ तशेंच बुथां प्रमाण वगळिल्ल्या नांवांची वळेरी दिल्या. गोंयांत हाचे आदीं 2002 त एसआयआर जाल्लें. 2002 आनी 2025 च्या मतदार वळेऱ्यांची पडटाळणी केली तेन्ना सुमार 1 लाख 82 हजार 855 मतदारांचें मॅपींग जावंक ना. हाचोच अर्थ ह्या मतदारांचें वा तांच्या आवय- बापायचें नांव 2002 चे मतदार वळेरेंत ना. ह्या सगल्या लोकांचें नांव मसुदो वळेरेंत येतलें. तांकां 16 ते 20 डिसेंबर मेरेन नोटीस धाडटले. हे खातीर सुनावणी घेवन निमाणो निर्णय घेतले. नोटिशेंत सुनावणेची तारीख आनी वेळ तशेंच सुवात नमूद केल्लें आसतलें, अशें गोयल हांणी स्पश्ट केलें. मसुदो मतदार वळेरी 16 डिसेंबराक जाहीर करतले. ही वळेरी ऑनलायन तशेंच ऑफलायन पद्दतीन उपलब्ध करतले. मसुदा वळेरी संबंदांत 16 डिसेंबर 2025 ते 15 जानेवारी 2026 मेरेन हरकत नोंद करपाक मेळटली. हे संबंदांतल्यो सुनावण्यो 7 फेब्रुवारी 2026 मेरेन निकालात काडटले. जाल्यार 14 फेब्रुवारी 2026 ह्या दिसा निमाणी मतदार वळेरी जाहीर करतले, अशें गोयल हांणी सांगलें.
आंकडेवारी
वट्ट मतदार- 11 लाख 85 हजार 34
एन्युनरेशन फॉर्म संकलीत- 10 लाख 84 हजार 956
मॅपींग जावंक नाशिल्लें- 1 लाख 82 हजार 855
मरण आयिल्ले मतदार- 25 हजार 574
सासणाचो नामो बदलिल्ले- 40 हजार 473
गैरहाजीर- 29 हजार 750
दोट्टी मतदान- 2008
फॉर्माचेर सय नासप, सय करपाक न्हयकार आनी हेर कारणां- 2273
मतदान केंद्रांत वाड
एसआयआर प्रक्रिये उपरांत उत्तर गोंयांत 1 जाल्यार दक्षीण गोंयांत 7 मतदान केंद्रां वाडयल्यांत. दक्षीण गोंयांतलीं 2 मतदान केंद्रां बंद केल्यांत. हे खातीर आतां गोंयांतलीं वट्ट मतदान केंद्रांचो आंकडो 6 वाडून 1731 जाला. हे विशीं राजकी पक्षांच्या प्रतिनिधींक कल्पना दिल्या, अशें गोयल हांणी सांगलें.
पुर्तुगेज पासपोर्टधारक 8 हजार
गोंयांत पुर्तुगेज पासपोर्टधारकांचे आंकड्यां विशां आमी गृह मंत्रालय, पासपोर्ट कार्यालय तशेंच एफआरआरओ हांचे कडेन चवकशी केल्या. पासपोर्ट कार्यालयान फाटल्या पांच वर्सांत 8,459 जाणांनी पुर्तुगेज पासपोर्ट घेतिल्ल्याचें सांगलां. गृह खात्याचो आंकडो कांय दिसांत कळटलो. ते उपरांत निमाणो आंकडो स्पश्ट जातलो. ते परांत अश्या लोकांचीं नांवां बीएलओ कडेन दितले. बीएलओ ह्या लोकांचीं नांवां एएसएसडींत आसात काय नात ताची पडटाळणी करतले. नांवां आशिल्ल्या लोकांक सुमोटो नोटीस धाडटले, अशें गोयल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
