भांगरभूंय | प्रतिनिधी
पणजी : जानेवारी ते ऑक्टोबर 2025 ह्या काळांत राज्यांत 237 जाणांक एच.आय.वी.ची लागण जाल्ली. 9 गुरवार बायलां सोडून 228 लोकां मदीं 173 दादले, 54 बायलो आनी एक ट्रांसजेंडराचो आस्पाव आसा. बायलांच्या पिरायेच्या गटा प्रमाण 35 ते 49 वर्सां पिरायेच्या गटांतल्या संसर्ग जाल्ल्या लोकांचो आंकडो हेर खंयच्याय पिरायेच्या गटा परस चड आसा. हाचे उपरांत 25 ते 34 वर्सां पिरायेच्या गटांतल्या संसर्ग जाल्ल्या बायलांचो आंकडो चड आसा. ही म्हायती राज्य एड्स नियंत्रण संघटणेन जाहीर केल्ल्या अहवालांतल्यान मेळयल्या.
अहवाला प्रमाण, वयल्या धा म्हयन्यांतल्या वट्ट 54 संसर्ग जाल्ल्या लोकां मदीं 25 (46.3 टक्के) 35 ते 49 वर्सां पिरायेच्या गटांतल्यो बायलो आसात. 16 (29.6 टक्के) 25 ते 34 वर्सां पिरायेच्या गटांत, 11 (20.4 टक्के) 50 वर्सां आनी ताचे वयल्या पिरायेच्या गटांत आनी 15 ते 24 वर्सां सकयल्या पिरायेच्या गटांत दरेकीं एक बायल 14 जाणांक संसर्ग जाला. दादल्यां मदीं सगळ्यांत चड (173 मदीं 67) 25 ते 34 वर्सां पिरायेच्या गटांत संसर्ग जाला. उपरांत 35 ते 49 वर्सां पिरायेच्या 54 (31.2 टक्के), 50 वर्सां आनी ताचे वयल्या 31 (17.9 टक्के) आनी 15 ते 24 वर्सां पिरायेच्या 27 (11 टक्के) लोक बाधीत आसात.
दादल्यां मदीं 14 वर्सां सकयल्या एक संसर्ग जाल्लो मनीस सांपडला. फाटल्या कांय वर्सांत 35 ते 49 वर्सां पिरायेच्या गटांतल्या संसर्ग जाल्ल्या बायलांचो आंकडो उणो जाला. 2020 वर्सा वट्ट संसर्ग जाल्ल्या बायलां मदल्या 56 टक्के बायलांक ह्या पिरायेच्या गटांत आशिल्ल्यो. 2021 वर्सा 52 टक्के, 2022 वर्सा, 37 टक्के, 2023 वर्सा आनी 2024 वर्सा 33 टक्के संसर्ग जाल्ल्या बायलांक ह्या पिरायेच्या गटांत आशिल्ल्यो. वयल्या काळांत दोगां बायलांक एड्साची लागण जाल्ली. सप्टेंबराच्या निमाणे मेरेन राज्यांत 20 दुयेंतींक एड्स जावन मरण आयलें. तातूंतले पांच बायला दुयेंती आशिल्ले.
संसर्ग जाल्ल्या बायलांचो आंकडो जालो उणो
2009 ते 2024 ह्या काळांत राज्यांतल्या दादल्यां परस बायलां मदीं एच.आय.व्ही. संसर्गाचें प्रमाण उणें जाला. 2009 वर्सा वट्ट एच.आय.वी.च्या दुयेंतींतले 59.3 टक्के दादले आनी 40.7 टक्के बायलां आशिल्ले. 2024 वर्सा 66.26 टक्के दादल्यांक आनी 33.73 टक्के बायलांक संसर्ग जाल्लो.
दर म्हयन्याक सरासरी 41 दुयेंती
राज्यांत 1987 वर्सा पयलो एच.आय.व्ही. दुयेंती सांपडिल्लो. हाचो अर्थ वयल्या काळांत राज्यांत वर्साक सरासरी 482 दुयेंती आनी म्हयन्याक सरासरी 41 दुयेंती मेळ्ळे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
