भांगरभूंय | प्रतिनिधी
नवी दिल्लीः पतंजली गट आनी रशिया सरकार हांचे मदीं दिल्लींत म्हत्वाची समजिकाय कबलात (एमओयू) जाली. पतंजली गटा वतीन स्वामी रामदेवजी हांणी आनी मॉस्को (रशिया) सरकारा वतीन भारत-रशिया वेवसायीक मंडळाचे अध्यक्ष आनी रशियेचो वाणिज्य मंत्री सर्गेई चेरेमीन हांणी ह्या कबलातीचेर सय केली.
कार्यावळीक संबोधीत करतना स्वामी रामदेवजी हांणी सांगलें, भलायकी आनी निरोगीपणाची चालना, भलायकी पर्यटन, कुशळ मनीस संसाधनांची आदान-प्रदान, संशोधन संबंदीत उपक्रम हांचेर हो एमओयू लक्ष केंद्रीत करता. रशियेंतले लोक योग, आयुर्वेद, सैमीक विकृतीची कदर करतात, अशें ताणें म्हळां. ताणें फुडें सांगलें की आमचो मुखेल ध्येय म्हळ्यार ऋषींचें हें निरोगीपण शास्त्र संवसारांतल्या सुमार 200 देशांनी व्हरप आनी रशिया प्रवेश बिंदू म्हूण काम करता.
ह्या एमओयूचो पयलो मुखेल हेत म्हळ्यार रशियेंत पतंजलीच्या निरोगीपण सेवांचो विस्तार करप. रशिये वांगडा पिराय वाडोवप आनी दीर्घायुष वाडोवपाचेर खोलायेन संशोधन करतले, जाका लागून गंभीर दुयेंसां मनशाचे कुडींत दिसचे पयलीं वर्सां आदीं बेगीन सोदून काडपाक मेळटलीं. भारताचें आध्यात्मीक गिन्यान, संस्कृताय, योग, आयुर्वेद आनी अमूल्य दायज रशिये कडेन वांटप हो दुसरो हेत. हे खातीर भारताची सांस्कृतीक आनी ऋषी परंपरा रशियेंत व्हरतले.
भारतांतले कुशळ मजुरी आनी प्रशिक्षीत योगी रशियेक मेळोवन दिवप हो ह्या एमओयूचो तिसरो हेत. प्रधानमंत्री कुशळटाय विकास येवजणे खाला पतंजली ही एकमेव खाजगी भागीदार जावन आसा, जांणी दोन लाखां परस चड लोकांक प्रशिक्षण दिलां. पतंजली रशियेक कुशळ योगी आनी प्रशिक्षीत कामगारांची पुरवण करतली. ते भायर ह्या एमओयू खाला रशियेंत मुखेल भारतीय ब्रँडांचो आनी भारतांत रशियन ब्रँडांचो प्रचार जातलो. संवसारीक दर्जाचो पतंजली ब्रँड रशियेंत व्हरतले, जाका लागून रशियन नागरिकांक पतंजलीच्या उच्च दर्ज्याच्या उत्पादनांचो फायदो मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
