भांगरभूंय | प्रतिनिधी
भांगरभूंय । , विशाल खांडेपारकार
एरणाकुळम ः केरळांतल्या कोंकणी साहित्य संमेलनांत कांय थारावी मांडिल्ले. ते विशींची ही खबर.
थाराव नंबर १
कोंकणी ही गोंय राज्याची राजभाशा. १९८७ वर्सा राजभाशा कायदो गोंयचे विधानसभेंत पारीत जालो. फाटल्या तीन वयर दसकांत राजभाशा कायद्यांत दुरुस्ती खातीर, तशेंच रोमी लिपीचो शांळांत उपचारीक शिक्षणांत आसपाव जावचो म्हूण मागण्यो जातात आनी विधानसभेचे कांय वांगडी ते मागणेक धरून खाजगी थाराव मांडटात. गोंय सरकारान ठाम भुमिका घेवन राजभाशा कायद्यांत बदल जावचो ना ही भुमिका घेतल्या. हें संमेलन गोंय शासनाक परबीं भेटयता.
गोंयच्या संस्कृतीक, समाजीक, अर्थीक, अस्मितायेच्या विशयां कडेन संबंदीत राजभाशा कायद्या कडेन सगल्या राजकीय पक्षांनी खंबीर रावचें आनी कायद्याच्या बदलाक कसलोय यत्न जाल्यार ताका विरोध करचो अशी शिटकावणी आनी मागणी हें २६ वें अखिल भारतीय साहित्य संमेलन करता.
थाराव नंबर २
गोंयांत पेडणें, बार्देस, दिवचल, सत्तरी, फोंडें, सांगें, केपें आनी काणकोण अश्या आठ म्हालांत कोंकणी माध्यमांतली एकूय सरकारी मुळावी शाळा अस्तित्वांत ना. पेडणें, सांगें आनी धारबांदोड्यां ह्या म्हालांत तर कोंकणी माध्यमांतली सरकारी, खाजगी मुळावी शाळा ना.
गोंय शासनान राश्ट्रीय शिक्षण धोरण आनी राजभाशा कायद्याक धरून शिक्षणीक पांवड्यार कोंकणी माध्यमाच्यो मुळाव्यो शाळा दरेका म्हालांत सुरू करच्यो आनी वांगडाच कोंकणी माध्यमांतल्या मुळाव्या शाळांक अर्थीक अनुदान दिवन शिक्षणीक साहित्य आनी सुविधांच्या निर्मिती खातीर पालव दिवचो असो थाराव हें २६ वें अखिल भारतीय साहित्य संमेलन पारीत करता.
थाराव क्र. ३
गोंय, कर्नाटक, महाराष्ट्र आनी केरळ राज्यांनी रावपी कोंकणी समाजाचें संस्कृतीक, साहित्यीक, भाशीक आदान- प्रदान जावपाचे नदरेन ह्या चारूय राज्यांनी आपले मदीं एक समजिकायेची कबलात करची आनी ह्या चारय राज्यांनी शिकपी कोंकणी आवयभास आशिल्ल्या भुरग्यां मदीं एकचार आनी भावचार वाडीक लागचे खातीर धोरण आखचें आनी ते खातीर गोंय शासनान फुडाकार घेवचो, अशें मागणें हें २६ वें अखिल भारतीय साहित्य संमेलन थारावा वरवीं करता.
थाराव नंबर ४
गोंय सरकार कोंकणी साहित्याक पोसवण दिवपा खातीर साहित्य प्रकाशन येवजण राबयता. हे येवजणेचो लाव फकत गोंयच्याच लेखकांक मेळटा. गोंय हें कोंकणी भाशेचें मूळपीठ. हे येवजणेचो फायदो गोंयची प्रकाशन संस्था उजवाडा हाडटल्या हेर राज्यांतल्याय लेखकांच्या साहित्या खातीर विस्तारीत करचो अशें हें साहित्य संमेलन गोंय शासना कडेन मागता.
थाराव नंबर ५
गोंयचो कोंकणी सिनेमा आंतरराश्ट्रीय मळार लेगीत पर्जळपाक लागला हें मतींत घेवन सिनेमाची निर्मणी, वितरावणी आनी प्रदर्शना खातीर अर्थीक पालव आनी हेर सगळ्या तरांचो तेंको, तशेंच तंत्रगिन्यानाची पुरवण दिवपा खातीर गोंय सरकारान गोंय सिनेमा उदरगत म्हामंडळ स्थापन करचें अशें हें अखिल भारतीय साहित्य संमेलन मागता. तशेंच नवी पिळगी उत्कृश्ट लघुपटांची निर्मणी करता तांचें प्रदर्शन करपा खातीर सिनेमा थेटरांनी फीचर फिल्मा आदीं ते दाखोवपाची सक्ती सरकारान करची आनी तरणे पिळगे खातीर सिनेमा प्रशिक्षण विद्यालय स्थापन करचें अशें हें साहित्य संमेलन मागता.
थाराव नंबर ६
कर्नाटक राज्यांत २००७ वर्सा सावन कोंकणी विशय तिसरी भास म्हूण शिकोवपा खातीर शासनान मेकळीक दिल्या. आतां मेरेन कर्नाटक राज्यांत चार- पांच हजार विद्यार्थी कोंकणी विशय घेवन धावी यत्ता पास जाल्यात. कर्नाटकांत माध्यमीक पांवड्यार कोंकणी भास घेवन सद्याक शिकपी भुरग्यांची संख्या २६० इतली आसा.
ह्या शाळांनी कोंकणी भास शिकोवपी शिक्षकांचो पगार मंगळुरूचें विश्व कोंकणी केंद्र दिता. कर्नाटक शासनान कोंकणी विशय शिकोवपी शिक्षकांचो पगार, शिक्षणीक साहित्या खातीर लागपी अर्थीक पालव दिवन कोंकणी विशयाच्या प्रसारा खातीर कर्नाटक शासनान आखचें असो थाराव हें साहित्य संमेलन पारीत करता.
थाराव नंबर ७
कोंकणी साहित्य हेर भाशांनी पावतलें जाल्यार अणकार म्हत्वाचो. ते खातीर, कोंकणी साहित्य प्रादेशीक भाशांनी आनी इंग्लीश भाशेंत अनुवादीत करूंक सरकारान राजभाशा संचालनालय वा गोवा कोंकणी अकादेमी वरवीं प्रकाशकांक आनी लेखकांक अनुदान दिवचें अशी मागणी करपी थाराव हें २६वे अखिल भारतीय कोंकणी साहित्य संमेलन पारीत करता.
सगले थाराव कार्याध्यक्ष चेतन आचार्य हांणी वाचलें.
ह्या वेळार साहित्यकार अध्यक्ष माधव बोरकार, सचीव स्नेहा सबनीस, संमेलनाचे स्वागताध्यक्ष सदानंद भट, संमेलन कार्याध्यक्ष आनंद कामत, भांडारी एच्चेम पेरनाळ आनी हेर मानेस्त हाजीर आशिल्ले.
संमेलनाचे स्वागताध्यक्ष सदानंद भट हांणी येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
