भारताची विवीधताय कुरतडपाच्या यत्नाचे फाटभूंयेर भाशांतर हें म्हत्वाची भुमिका करपाक शकता : प्रभा वर्मा

भांगरभूंय | प्रतिनिधी

केरळांत कोंकणी साहित्य संमेलन सुरू, आयज, फाल्यां जातले विवीध परिसंवाद

भांगरभूंय । प्रतिनिधी
एरणाकुळम : एकसारकी संस्कृती लादप आनी एखादे भाशेत उच्च दर्जो आपूण जावन दिवप हाका लागून सांस्कृतीक वैविध्य आशिल्ल्या भारताची विविधतायूच कुरतडले सारकी जाता. अशा विघातक यत्नांचे फाटभूंयेर भाशांतर हें म्हत्त्वाची राजकी भुमिका करता. तें सांस्कृतिक दिवप घेवप निश्चित करता. तें राष्ट्रांतली विविधतायेचो उत्सव मनयता, जी आमच्या घटनात्मक मुल्यांची बुन्याद आसा. भाशांतर हो संवसाराच्या वेगवेगळ्या भागांक जोडपी म्हत्वाचो पूल —एक संस्कृती दुसरे संस्कृताये कडेन जोडपी आनी “ग्लोबल व्हिलेज” निर्माण करपाक योगदान दिवपी. तेन्ना अणकाराचे आमी भर दिवंक जाय. भारतीय भाशां मदीं ज्या प्रमाणांत परस्पर दिवप घेवप जावंक जाय, तें जायना. प्रत्येक भाशा एकमेकां पसून पयसूच रावता. ही परिस्थिती मुखार चालू उरपाक जायना, अशें सरस्वती सन्मान जोडपी साहित्यीक प्रभा वर्मा हांणी सांगलें. ते केरळांतल्या एरणाकुळमांत आयोजीत 26 व्या अ. भा. कोंकणी साहित्य संमेलनांत मुखेल सोयरे म्हूण उलयताले. संमेलनाचे अध्यक्ष कवी माधव बोरकार ह्या वेळार हजर आशिल्ले. मानाचे सोयरे राजभाशा उपसंचालक अनिल सावंत आशिल्ले.

संमेलनाध्यक्ष माधव बोरकार हांणी सांगलें : कोंकणी साहित्याचो इतिहास बरयतना कांय अडचणी उपरासतात त्यो म्हणल्यार लिपयांच्यो. लिपयांच्या वणटींनी कोंकणी साहित्याचें खूब मोटें लुकसाण केलां. त्यो नाशिल्ल्यो जाल्यार आमचें साहित्य व्हड गतीन फुडें वतलें आशिल्लें. ही परिस्थिती आतां थोड्याभोव प्रमाणांत बदलत आसा. जेन्ना ह्यो वणटी कोसळटल्यो तेन्ना खऱ्या अर्थान कोंकणीच्या मळार भांगराचें पर्व उदेतलें. तो भाग्यवंत काळ रोखडोच येवं.

मानाचो सोयरे राजभाशा उपसंचालक अनिल सावंत, संमेलनाचे अध्यक्ष कवी माधव बोरकार, परिशदेचे कार्याध्यक्ष चेतन आचार्य, सचीव स्नेहा सबनीस, संमेलनाचे स्वागताध्यक्ष सदानंद भट, संमेलन कार्याध्यक्ष आनंद कामत आनी हेर माचयेर हाजीर आशिल्ले.

येवकार सदानंद भटान दिलो. संमेलनाचे कार्याध्यक्ष आनंद कामत हांणी सांगलें, केरळांत आयज तिसरें संमलेन जाता, केरलांत कोंकणी उलोवपी मनीस उणें पूण कोंकणी आमी खातात; कोंकणी जिवीत जियेतात. आमकां मुळावें शिक्षण ना तरीय आमी कोंकणी राखून दवरल्या.
आयज मेरेन कोंकणी परिशदेन कोंकणी समाज, आनी कोंकणी संस्थांक बांदून एकठांय हाडपाचो वावर केला. तेन्ना दोन दिसांचें साहित्य संमेलनाचे जैतिवंत करुया अशें परिशदेचे कार्याध्यक्ष चेतन आचार्य हांणी सांगलें.

समाजाक दिका दाखोवपी काम कोंकणी भास करता. साहित्यांतली मुल्ल्यां समाजा पासत गरजेचीं. आयज मेरेन साबार चळवळी समाजांत जाल्यो. तेन्ना भाशेक लागून सांस्कृती तिगता. हातूंत प्रशासन हो समाजाचो घटक. देखून कोंकणी भाशे पासत गोंयचे मुख्यमंत्री प्रमोद सावंत कणखर भुमिका घेतल्या. कोंकणी साहित्य आनी हेर मळार अर्थीक पालव दितात.आमचो देस विविधतायेन नटला आनी भरला.कोंकणी हें ताचें प्रतीक. तेन्ना प्रशासनांत कोंकणी भास सांबाळपाक आमचे प्रयत्न आसतले अशें अनिल सावंत हांणी सांगलें.

बाल-साहित्य जैतिवंत लेखिका नयना आडारकार आनी अणकार पुरस्कार जैतिवंत मिलिंद म्हामल हांचे हस्तुकीं शाल, श्रीफल आनी यादस्तीक दिवन साहित्यकार प्रभा वर्मा हांणी सत्कार केलो.

अणकार जावप गरजेचें

एके भाशेंतलें साहित्य दुसरे भाशेंत पावतलें जाल्यार ताचो अणकार जावप गरजेचें आसता. आमचें भारतीय साहित्य आमच्या देशाची शीम हुपून संवसारभर पावलें तें अणकाराचे प्रक्रियेक लागून. ताचें स्त्रय विलियम जोन्स ह्या ब्रिटीश अनुवादकाक दिवंक जाय. कवी कुलगुरू कालिदास हो इ. स. चवथ्या-पांचव्या शेंकड्यांतलो. गुप्ताच्या काळांतलो म्हाकवी. ताका संस्कृत काव्याचो सम्राट आनी कविकुलगुरू अश्यो पदव्यो मेळ्ळ्यो. ताच्या साहित्यांत भारतीय जिणेचें दर्शन घडटा. धर्म, संस्कृताय, सैम, अध्यात्म आनी मनीसपणाचीं मुल्यां अशीं विंगड विंगड परिमाणां ताच्या साहित्यकृतींनी पळोवपाक मेळटात, अशें तांणी सांगलें.

अणकार हो संस्कृतायांचो मिलाफ

अणकार म्हणल्यार दोन भिन्न संस्कृतायांचो मिलाफ अशें म्हणूं येता. संस्कृत-इंग्लीश आनी संस्कृत-फ्रॅंच ह्यो भासो अणकारा वरवीं एकठांय येतात तेन्ना दोन संस्कृतायां मदीं दिवप घेवप जाता. अणकार म्हणल्यार एके तरेचें स्थळांतर आसता. मूळ भासो जाणा जावन घेवन त्या भाशांतलें साहित्य वाचप हें सर्वसामान्यांक जमना, अशें श्री. बोरकार हांणी सांगलें.

व्हडली सांस्कृतीक परंपरा

प्रभा वर्मा हांणी मुखार उलतना सांगले : कोंकणीक हजार वर्सांचो इतिहास आसा. गोंय आनी कर्नाटक, केरळ, महाराष्ट्राच्या कांय भागांत ती उलयतात. तिका व्हडली सांस्कृतीक परंपरा आसा. तातूंत 10व्या शेंकड्याच्या भक्ती चळवळींत गीतां, कविता तयार जाल्यात. 16व्या शेंकड्यांत पुर्तुगेज येतकच कोंकणीचेर तांचे भाशेचो प्रभाव पडलो.उपरांत थाॅमस स्टिवन्स, शणै गोंयबाब आनी शेंकड्यांनी साहित्यकारांनी कोंकणी गिरेस्त केली. कोंकणीक कायम संघर्श करचो पडला. आयज कोंकणी हेर भाशांच्या खांदाक खांद लावन उबी आसा.
कोंकणीची उच्च प्रतिश्टाय आतां जगभर पावल्या. तुमी संवसाराक पटोवन दिलां की हे भाशेंत अशें साहित्य आसा की जाची तुळा नोबेल पुरस्कार निर्माण करपी भाशां कडेनूय करपाक मेळटा. स्वबळग्याचेर उबें रावपाचो तुमी दाखयिल्लो अभिमान खऱ्यानीच स्तुत्य आसा, अशें सांगून तांणी कोंकणी भाशकांची तुस्त केली.
परिशदेचे चेतन आचार्य हांणी सुत्रसंचालन, स्नेहा सबनीस हाणें उपकार मानले. अनंत अग्नी हांणी सुत्रसंचालन केलें.

पुस्तक प्रकाशन, साहित्य सादरीकरण, परिसंवाद

पयल्या दिसा सकाळीं मुकेश थळी, नयना आडारकार मिलिंद म्हामल, ग्लिनीस डायस हांचो भोवमान जालो. उपरांत 21 व्या शेंकड्यांतल्या कोंकणी साहित्याचे नवे प्रवाह आनी प्रयोग ह्या विशयाचेर परिसंवाद जालो. ह्या परिसंवादाक अध्यक्ष प्रो. भूषण भावे (गोंय), सत्रांत वाटेकार डॉ. वामन नायक (महाराष्ट्र), डॉ. हरीन्द्र शर्मा . (केरळ), डॉ. जोकीम पिंटो (कर्नाटक) हांचो आसपाव आशिल्लो. दनपरां संमेलनाध्यक्ष बोरकार हांची मुलाखत जाली. ती प्रसाद लोलयेकार हांणी घेतली.
2.30 वरांचेर साहित्य सादरीकरणांत हातूंत कमलाकार म्हाळशी, भिकू बोमी नायक, वामन टाकेकार, विवेक पिसुर्लेकार, किरण म्हांबरे, विठ्ठल आवंदीयेकार, उषा कामत, रत्नामाला दिवकार, विल्सन कटील, प्रशांती तळपणकार, विनायक गोवेकार, पंढरीनाथ सुरसुरे, मिलिंद भरणे, उदय गुडे, सरस्वती नायक हांणी सादरीकरण केलें. सांजवेळा साहित्य सादरीकरणांत माया पी. एस एस. रामकृष्ण किणी, के. एन. आर. भट, कांचना बोस, जी मोहन राव, ए. पी. भानुप्रकाश, अंजली किणी, कृष्णा कुमार, के. एस, अनिता डी. किणी, आर. रामानंद प्रभू हांचो आसपाव आशिल्लो. उपरांत कोंकणी साहित्यांत इतिहासीक कादंबरी ह्या विशयाचेर चर्चा सत्र जालें. संचालक डॉ. हनुमंत चोपडेंकार ( गोंय) आनी वांटेकार डॉ. प्रेम मोरास (कर्नाटक) उर्वशी नायक ( गोंय ) जेसन पिंटो (कर्नाटक) हांणी वांटो घेतलो. सांजवेळा जावपी साहित्य सादरीकरणांत नरेश नायक, कल्लच्चु महेश नायक, योगिनी आचार्य, प्रसाद पागी, रजत हेगडे, विशाल खांडेपारकार, रुपेश वरक, गौरंग भांडीये, समिक्षा शिरोडकर हांचो आसपाव आसा. मागीर प्रो. भूषण भावे हांची हॉर्तुश इंदिकुश मलबारिकुश- कोंकणी संस्कृतायेची तेंगशी’ कार्यावळ जातली.

आयतार, 23 नोव्हेंबराक सकाळीं 9.30 वरांचेर कोंकणी साहित्याचो हेर भाशेंतलो अणकार ह्या विशयाचेर परिसंवाद जातलो अध्यक्ष शैलेंद्र मेहता (महाराष्ट्र) आनी ह्या परिसंवादांत वांटेकार जावपी डॉ. ग्लिनीश मेंडोन्सा (गोंय), आर एस भास्कर (केरळ)
डॉ. रमिता गुरव ( गोंय) मिलिंद म्हामल ( गोंय ) हांचो आसपाव आसा. उपरांत साहित्य सादरीकरण जातलें. हातूंत माधव बोरकार (कविता), डॉ. जयंती नायक ( कथा ), शरतचंद्र शेणय ( कविता ), गोकुलदास प्रभू (कथा) आर. एस. भास्कर (कविता), मेल्विन रॉड्रीग्स (कथा), सुर्या अशोक (कविता) हांचो आसपाव आसा. दनपरां 12 वरांचेर कोंकणी पुस्तक प्रकाशनां मुखा वयलीं आव्हानां ह्या विशयाचेर चर्चा सत्र जातलें. हातूंत संचालक मेल्विन रोड्रीग्स (कर्नाटक) आनी वांटेकार जावपी प्रभाकर भिडे ( गोंय) दिनेश मणेरकार (गोंय ) हेन्री मेंडोन्सा (कर्नाटक) पय्यनूर रमेश पै (केरळ) हांचो आसपाव आसा. उपरांत समारोप सुवाळो जातलो.