भांगरभूंय | प्रतिनिधी
शिंयाच्या दिसांनी जेवपाक, पिवपाक आनी आराम करपाक सुखद वातावरण मेळटा. पूण भलायकेच्यो जायत्यो समस्या निर्माण जातात. ह्या काळांत थंडी, खोंकली, गळो दुखप आनी स्वास घेवपाचे त्रास वाडटात. उण्या आर्द्रतेक लागून कात सुकता, भुरग्यांक आनी जाण्ट्यांक व्हायरसाची लागण जावपाची शक्यताय वाडटा. इतलेंच न्हय तर वाडिल्लें प्रदुशण आनी धुकें हाका लागून स्वास घेवपा संबंदीत दुयेंस वाडूंक शकतात. पूण थोडी जतनाय घेवन आनी दिसपट्ट्या सवयींत बदल करून ह्यो समस्या टाळूं येतात. योग्य जेवण, फावो तितले उदक पियेवप आनी रोगप्रतिकार शक्त वाडोवप हाका लागून शिंयाच्या दिसांनी जावपी दुयेंसां पसून राखण मेळूं येता.
शिंयाच्या दिसांनी ह्या दुयेंसाचो धोको वाडटा…
थंडी आनी खोंकली
शिंयाच्या दिसांनी थंड आनी सुकें हवेक लागून नाक आनी गळ्यांतली ओलसाण उणी जाता. हाका लागून व्हायरस सोंपेपणान भितर सरता. रोगप्रतिकार शक्तय दुबळी जावन थंडी आनी फ्लू चड प्रमाणांत जाता.
व्हायरसाची लागण
थंड तापमानाक लागून व्हायरस हवेंत आनी पृश्ठाचेर चड काळ जियेवंक शकतात. बंद कुडींक लागून संसर्ग एका मनशा कडल्यान दुसऱ्या मनशाक बेगीन पातळपाक मजत जावंक शकता.
इन्फ्लूएंझा
थंड, सुक्या हवामानांत फ्लू व्हायरस बेगीन पातळटा आनी ताका लागून जोर, थकवो, आंग दुखप अशें त्रास जातात. खास करून जाण्ट्यांक आनी भुरग्यांक.
जोर आनी खोंकली
थंड हवेक लागून गळो आनी स्वास मार्ग सुकता आनी ताका लागून संसर्ग जावपाचो धोको वाडटा. रोगप्रतिकार शक्त दुबळी जाल्ल्यान परतून परतून जोर आनी खोंकली येवंक शकतात.
ब्राँकायटिस
थंड हवेक आनी प्रदुशणाक लागून श्वसनमार्गांत जळजळ जावन खर खोंकली येवप, स्वास घेवपाक त्रास जावप आनी श्लेष्म तयार जाता.
सांधेदुखी
थंड हवामानाक लागून रगताची येरादारी मंद जाता, जाका लागून सांध्यांची लवचीकता उणी जाता, जाका लागून दीर्घकाळ वेदना जावंक शकता आनी संधिवाताचीं लक्षणां वाडूंक शकतात.
कातीची समस्या
थंड, सुकें हवेक आनी उण्या ओलसाणीक लागून कात सुकी, खरखरीत जाता आनी खाज येता.
सीझनल अफेक्टिव डिसऑर्डर (SAD)
शिंयाच्या दिसांनी सुर्याचो उजवाड उणो जाल्ल्यान मनस्थितीचेर आनी उर्जेचे पातळेचेरूय परिणाम जावं येता. हाका लागून थकवो येवप, दुख्ख वा उदासीनताय अशीं लक्षणां दिसूंक शकतात.
न्युमोनिया
थंड हवामानाक लागून फुफ्फुसाचें काम उणें जाता आनी बॅक्टेरियाची लागण जावपाचो धोको वाडटा, जो भुरग्यांक आनी जाण्ट्यांक जीवघेणी थारूंक शकता.
शिंयाच्या दिसांनी निरोगी उरपाक…..
दर दिसा 15-20 मिनटां सुर्याचो उजवाड घेवचो.
व्हिटामीन सी दिवपी फळां खावची.
कोमट हळदीचे दुद, काडो वा सूप पियेवचें.
फावो तितले उदक पियेवचें.
ओमेगा 3 आशिल्ले पदार्थ खावचें.
संतुलित आहार खावचें.
पांचव्यो भाजयो खावच्यो.
चड वेळ उपाशी रावचें न्हय.
थंडी टाळून गरमी दिवपी कपडे घालचें.
चड थंड हवेंत भायर सरचें न्हय.
दर दिसा 20 मिनटा व्यायाय करात.
नितळसाण दवरात.
दर दिसा 8 वरां न्हिद घेयात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
