भांगरभूंय | प्रतिनिधी
दोन दिसां पयलीं तीन ट्रॉलर घेतिल्ले ताब्यांत
पणजी: गोंयचे शिमेंत येवन बेकायदो नुस्तेमारी करपी मालपे-कर्नाटकांतलो ट्रॉलर वास्को वाठारांतल्या दर्यांत गोंयच्या नुस्तेमार खात्यान आयतारा फांतोडेर ताब्यांत घेतलो. दोन दिसां पयलीं तीन ट्रॉलर खात्यान ताब्यांत घेतिल्ले.
नुस्तेमार खात्यान दर्यांत गस्त घालपा खातीर नव्यो दोन बोटी घेतल्यात. एक उत्तर गोंय जाल्यार दुसरी दक्षीण गोंयांतल्या दर्यांत दर्यादेग पुलिसां वतीन गस्त घालपा खातीर वापरतात.
आयतारा फांतोडेर दर्यांत गस्त घालपी बोटीक गोंयचे शिमेंत नुस्तेमारी करपी एक ट्रॉलर सांपडलो. ट्रॉलराक नुस्तेमार खात्यान ताब्यांत घेवन पणजे हाडलो.
दोन दिसां पयलीं गोंयचे शिमेंत बेकायदो नुस्तेमारी करपी तीन ट्रॉलर खात्यान ताब्यांत घेतिल्ले. ताब्यांत घेतिल्ल्या चारूय ट्रॉलर्सांचेर खात्या वतीन कारवाय करतले अशें नुस्तेमार खात्याच्यो संचालिका शामिला मोन्तेरो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
