भांगरभूंय | प्रतिनिधी
फाटल्या णव म्हयन्यांत येरादारी नेमांच्या उल्लंघनात वाड
पणजी: गोंयांत 1 जानेवारी 2025 ते 30 सप्टेंबर 2025 ह्या णव म्हयन्याच्या काळांत येरादारी नेमांचें उल्लंघन केल्ल्यान येरादारी खात्यान 6,734 वाहन चालकांचीं लायसनां निलंबीत केल्यांत. हातूंत सगल्यांत चड 4,874 हॅल्मेट घालूंक नाशिल्ल्या जाल्यार 534 सोरो पियेवन गाडी चलयिल्ल्या चालकांचीं लायसनां निलंबीत केल्यांत.
सर्वोच्च न्यायालयान देशांत वाडट्या रस्तो अपघातांत मरण येवप्यांची संख्या वाडत आशिल्ल्यान ताची दाखल घेवन रस्तो सुरक्षा समिती स्थापन केल्ली. हे समितीन येरादारी नेम पाळिनाशिल्ल्यांचीं लायसनां तीन म्हयन्यां खातीर निलंबीत करपाची शिफारस केल्या.
देशांत दिसानदीस रस्त्यार अपघात जावन मरण येवपाचे संख्येंत वाड जायत आशिल्ल्यान हाची दखल घेवन सर्वोच्च न्यायालयान न्यायमुर्ती अभय मनोहर सर्पे हांचे अध्यक्षताये खाला नवी रस्तो सुरक्षा समिती स्थापन केल्या. हे समितीन अपघात, रस्त्याची बांदणी तशेंच अपघाती मरण तशेंच हेर संबंदीत विशयाचो अभ्यास करून अहवाल तयार केला आनी राज्य सरकाराक मार्गदर्शन तत्वां जारी केल्यांत.
मोटार वाहन कायदो 1988 च्या कलम 19 आनी केंद्रीय मोटार वाहन नेम 1989 च्या कलम 21 प्रमाण वाहन परवानो निलंबन करपाची तरतूद आसा. हे कारवायेची अंमलबजावणी करपाची शिफारस समितीन देशांतल्या सगल्या राज्यांक तशेंच संघ प्रदेशांक निदेश दिल्ले.
ह्या मार्गदर्शन तत्वा प्रमाण गतीन वाहन चलोवप, जंक्शना कुशीक आशिल्ल्या येरादारी सिग्नलाक पाळो न दिवप, म्हाल व्हरपी वाहनांतल्यान प्रवाशांची येरादारी करप, म्हाल व्हरपी वाहनांतल्यान चड म्हालाची येरादारी करप, सोरो पियेवन गाडी चलोवप आनी गाडी चलयतना मोबायलार उलोवप ह्या येरादारी नेमां खातीर चलकांचीं उण्यांत उणीं तीन म्हयन्यां खातीर लायसनां निलंबीत करपाची तरतूद केल्या.
ह्या समितीच्या मार्गदर्शक तत्वा प्रमाण सोरो पियेवन गाडी चलोवपाच्या प्रकरणांत वाहन चालकाचें लायनस करपाचो अधिकार पयलो वर्ग न्यायालयान दिला. जाल्यार वयल्या हेर नेमांच्या उल्लंघना खातीर संबंदीत येरादारी खात्याक अधिकार दिल्यात. अहवाल मेळ्ळे उपरांत संबंदीत वाहन चालकाक न्यायालयांत वा येरादारी खात्यांत हजर रावपाक समन्स काडटात. उपरांत ह्या प्रकरणांत रितसर सुनावणी घेवन उपरांत दोशी दिसून आयल्यार तांचीं लायसनां तीन म्हयन्यां खातीर निलंबीत करतात.
तेप्रमाण येरादारी खात्यान वयल्या णव म्हयन्यांत 6,734 जाणांचीं लायसनां निलंबीत केल्यात. तातूंत सगल्यांत चड हॅल्मेट घालूंक नाशिल्ल्यान 4,874, गतीन वाहन चलयिल्ल्यान 355, मोबायलाचो वापर केल्ल्यान 489, सोरो पियेवन वाहन चलयिल्ल्यान 534, येरादारी सिग्नलाक पाळो न दिल्ल्यान 130, म्हाल व्हरपी वाहनांतल्यान प्रवाशांची येरादारी केल्ल्यान 27, निश्काळजीपणान वाहन चलोवन अपघात केल्ल्यान 7, दुचाकीचे फाटल्यान दोन वा ताचे परस चड जाणांची येरादारी केल्ल्यान 180 आनी सीट बेल्ट घालूंक नाशिल्ल्यान 138 मेळून 6,734 जाणांचीं लायसनां येरादारी खात्यान निलंबीत केल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
