भांगरभूंय | प्रतिनिधी
पणजी: जिल्हो पंचायत वेंचणूक 13 डिसेंबराक जावपाची आशिल्ल्यान आनीक चार दिसांनी आचारसंहिता लागू जातली. 13 नोव्हेंबरा सावन आचारसंहिता लागू जातली अशी म्हायती गोपांनी दिली.
जिल्हो पंचायत वेंणचुकेची तारीख जाहीर जाले उपरांत आरक्षण लेगीत जाहीर जालां. हाका लागून खंयचो मतदारसंघ बायलां खातीर वा ओबीसी खातीर राखून आसा, ताची म्हायती उमेदवारांक मेळ्ळ्या. इत्सुकांनी प्रचार तशेंच वेंचणुकेची हेर तयारी सुरू केल्या. आचारसंहिता लागू जातना अर्ज भरपाची तारीख, अर्जांची छाननी, अर्ज फाटीं घेवप ही सगली कार्यावळ जाहीर जातली.
गोंयांत 13 डिसेंबराक जावपी जिल्हो पंचायत वेंचणुकेच्या आरक्षणाची अधिसुचोवणी जारी जाल्ल्यान उमेदवारांचे निवड प्रक्रियेक गती आयल्या. इत्सुकां कडल्यान तयारी सुरू आसतनाच आतां आरक्षण जाहीर जालां. हाका लागून उमेदवारीचेर दावो करपाक सुरवात जाल्या. जे मतदारसंघ बायलां खातीर राखून आसात, त्या मतदारसंंघात सध्याच्या चडशा वांगड्यांच्यो बायलो बाशींग बांदून तयार आसात.
उत्तर गोंयांत हरमल, मोरजी (ओबीसी), कोलवाळ, कळंगूटे, रेईश मागूश, सांता क्रुझ (ओबीसी), चिंबल, सेंट लॉरेन्स (ओबीसी), मयें हे मतदारसंघ बायलां खातीर राखीव आसात. केरी मतदारसंघ एससी खातीर आरक्षीत आसा जाल्यार ताळगांव मतदारसंघ एसटी खातीर आरक्षीत आसा.
मोरजी (बायलां), तोर्शें, हणजूण, सांता क्रुझ (बायलां), सेंट लॉरेन्स (बायलां), पाळी, होंडा हे ओबीसी खातीर आरक्षीत आसात.
दक्षीण गोंयांत उसगांव – गांजे, वेलींग – प्रियोळ, बोरी, शिरोडें, नावेली (ओबीसी), रिवण (एसटी), बार्शें, खोला (ओबीसी), कुठ्ठाळे हे मतदारसंघ बायलां खातीर राखून आसात. कुट्टी, राय, गिरदोळी, सांवड्डें, रिवण (बायलां ) हे मतदारसंघ एसटी खातीर राखून आसात. कवळें, नुवें, दवर्ली, कुडटरी, नावेली (बायलां), खोला (बायलां) हे मतदारसंघ ओबीसी खातीर राखून आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
