भांगरभूंय | प्रतिनिधी
डॉ. प्रमोद सावंत: पेडण्यां सहकार भारतीच्या आठव्या अधिवेशनाचें उक्तावण
पेडणें: नरेंद्र मोदी हांच्या सपनांतलें विकसीत भारत आनी विकसीत गोंय 2037 सपन प्रत्यक्षांत हाडपा खातीर सहकार भारतीन सहकराच्या माध्यमांतल्यान यत्न करचे. ते खातीर गोंयच्या सहकार मळार तरणाटे आनी बायलां कार्यकर्त्यांचो व्हड प्रमाणांत आस्पाव करचो अशें मुख्यमंत्री डॉ. प्रमोद सावंत हांणी सांगलें.
गोंयच्या सहकार भारतीच्या आठव्या अधिवेशनाचें पेडण्यां उक्तावण केले उपरांत ते उलयताले. ह्या वेळार माचयेर राज्यसभा खासदार सदानंद शेट तानावडे, गोवा राज्य सहकारी बँकेचे अध्यक्ष पांडुरंग कुट्टीकार, पेडणें नगरपालिकेच्यो नगराध्यक्षा अश्विनी पालयेंकार बी मानेस्त हाजीर आशिल्ल्यो.
देशांत सहकार मळार तोखणायेची कामगिरी करपी सहकार भारती आयज गोंयांत मुखेलपणान सहकार मळार व्हड बदल घडोवन हाडपा खातीर कार्यरत आसा. सहकारांतल्यान समृद्धी घडोवपाक सज्ज आसा. गोंयच्या सहकार मळार विस्वासाची कामगिरी करून लोकांचो विस्वास संपादन करप काळाची गरज आसा अशें मुख्यमंत्र्यांनी म्हणलें.
सहकार मळार आशिल्ल्यो पळवाटो बंद करून सहकाराक नवी दिशा दिवपा खातीर सहकार भारतीन फुडाकार घेवचो. गोंयच्या सहकाराचो सर्वसामान्य लोकांक कसो फायदो जातलो हाचे कडेन लक्ष दिवंक जाय. गोंयांत सहकाराक खूब वाव आसा पूण ते खातीर संघटीत कार्यकर्त्यांची गरज आसा. सरकाराचें सहकार्य तांकां मेळटले अशें मुख्यमंत्र्यांनी म्हणलें.
आयज गोंयांत सहकार भारतीच्या माध्यमांतल्यान सहकार कार्यकर्ते संघटीत जायत आसात ही निश्चीतपणान समाधानाची गजाल आसा. सहकार मळार निसुवार्थीपणान कार्य करीत जाल्यार संस्थांची उदरगत निश्चीत जाता अशें खासदार सदानंद शेट तानावडे हांणी म्हणलें.
सुरवेक श्रीपाद परब हांणी येवकराचें उलोवप केलें जाल्यार सहकार भारतीचे अध्यक्ष अशोक गावडे हांणी प्रस्तावीक केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
