भांगरभूंय | प्रतिनिधी
दिवचल म्हालांत भातपिकाचें अदमाशेक देड कोटी वयर लुकसाण
दिवचल: जून ते सप्टेंबर ह्या चार म्हयन्यांत सरासरी राखून पडिल्ल्या पावसान ऑक्टोबर म्हयन्यांत खवदळ घालो. पिकिल्ल्या शेताचें व्हड प्रमाणांत लुकसाण केलें. दिवचल म्हाला सयत गोंयच्या हेर म्हालांनी लेगीत हीच परिस्थिती आसा. दिवचल म्हालांत सुमार 397 हॅक्टर शेतजमनीतलें सुमार 650 परस चड शेतकारांचें लुकसाण जालां. हो आंकडो अदमाशेक देड कोटी परस चड आसा. अजूनय कांय शेतकारांनी नोंदणी केल्ली ना. ताका लागून आंकडो वाडपाची शक्यताय आसा.
ह्या वर्सा बरो पावस पडिल्ल्यान भाताचें पीक बरें आयिल्लें. लुंवणीची तयारीय सुरू आशिल्ली. पूण अचकीत उटंगाराचो पावस पडिल्ल्यान शेतकार संकश्टांत आयले. सगल्या शेतांनी उदक भरिल्ल्यान शेतकारांचें व्हड प्रमाणांत लुकसाण जालें.
दिवचल म्हालांतल्या मयें, साळ, मेणकुरें, न्हावेली, आमोणें ह्या वाठारांनी व्हड प्रमाणांत शेतकारांनी भात रोंयिल्लें. पूण ह्या वर्सा पिकून तयार जाल्ल्या शेतांत पावसाचें उदक सांचिल्ल्यान कापणी यंत्र घालप कठीण जालें. शेतकी खात्यान एक खाजगी कापणी यंत्राच्या सहाय्यान लाटंबार्से, मयें गांवांतल्या कांय शेतांनी लुंवणी केल्ली. पूण ह्या वाठारांत लुंवणी करून लेगीत भात ओलसार उरिल्ल्यान ताका कोंब फुटले.
लुंवणी जाले उपरांत ते दोन दीस खर वतात सुकोवन घेवचें पडटा. शेतकार हे भात लुंवणे उपरांत आपल्या आंगणांत, रस्त्यार वा शेतांनी सुकयतात. पूण ह्या वर्सा भात सुकोवपाची संद शेतकारांक मेळूंक नाशिल्ल्यान लुंवणी केल्लें भात पेड्डेर जालें. हाका लागून शेतकारांचें व्हड प्रमाणांत लुकसाण जालें अशें दिवचल विभागीय शेतकी अधिकारी कचेरेंतले सहाय्यक शेतकी अधिकारी नवनाथ पिसुर्लेंकार हांणी सांगलें.
लुंवणे वेळार पावसान खवदळ घाल्ल्यान शेतकी अधिकारी कचेरेंतल्या पंगडान शेताची पळोवणी केल्ली. तातूंत सुमार 90 टक्के भातपीक पेड्डेर जाल्ल्याचें नदरेक आयलें. ही लुकसाणी रु. 40 हजार प्रती हॅक्टर प्रमाण सवलत ह्या प्रमाण मेजतात. वास्तवीक एका हॅक्टराक 3500 – 4500 कील भात मेळटा. ह्या प्रमाण दिवचल म्हालांतल्या 397 हॅक्टर जमनींत पिकिल्ल्या भातशेताचें लुकसाण जालां. ताका लागून लुकसाणेचो आंकडो खूब मोटो आसा.
मजगतीं, मुख्यमंत्री डॉ. प्रमोद सावंत हांणी ताकतिकेची दखल घेवन मजत जाहीर केल्ल्यान थाकाय मेळ्ळ्या. शेतकी अधिकारी सर्वे करून अहवाल सादर केले उपरांत मजत निधी निश्चीत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
