भांगरभूंय | प्रतिनिधी
विरोधकांच्या एकवटा विशीं उक्तायलो प्रस्न
पणजी : महाराष्ट्रवादी गोमंतक पक्षाची भाजप वांगडा युती आसा. हाका लागून फोंड्यां पोट वेंचणुकेंत भाजप जो कितें निर्णय घेतलें, ताका मगोचो तेंको आसा, अशें वीजमंत्री आनी मगोचे आमदार सुदिन ढवळीकार हांणी म्हणलें. विरोधकांनी ह्यान पयलीं जायते पक्ष बदल्ले. ते एकसंध रावप शक्यूच ना, अशें तांणी सांगलें.
पर्वरी मंत्रालया भायर विवीध विशयांवचेर वीजमंत्री सुदिन ढवळीकार हांणी भाशण केलें. शेतकी मंत्री रवी नायक हांच्या मरणाक लागून फोंड्यां आतां पोट वेंचणूक जातली. रवी नायक हांचो पूत रितेश नायक हांकां उमेदवारी दिवपाची मागणी जाता. रितेश नायक हांचे उमेदवारीक मगोनय पूर्ण फाटबळ दिलां.
जो कोण मगो पक्षांत आसा, ताका मगोचो निर्णय मान्य करचोच पडटलो. मगोची भाजपा वांगडा युती आशिल्ल्यान फोंडें पोटवेंचणुकेंत भाजपाकूच आमचें फाटबळ आसतलें, अशें तांणी सांगलें.
विरोधकांचो एकवट अशक्य
दिवाळे आदीं फातोड्डेंचे एके कार्यावळींत कॉंग्रेस, गोवा फॉरवर्ड आनी आरजीचे फुडारी एकठांय आयिल्ले. हाका लागून विरोधकांचो एकवट परत चर्चेंत आयला. विरोधी पक्षांतल्या फुडार्यांनी जायते पक्ष बदल्ले. ते केन्नाच एकठांय येवपाक शकनात, हाची म्हाका पूर्ण खात्री आसा अशें ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
