भांगरभूंय | प्रतिनिधी
जपान भोंवडे उपरांत बेंगळुरूंतले बायलेचो अणभव व्हायरल
बेंगळुरूः हांगाचे एके भारतीय बायलेन जपानांतले भोंवडे उपरांत तिच्या जिवितांतल्या फरकां विशीं रेडिटाचेर (Reddit) बरयल्लो पोस्ट खूब व्हायरल जाला. भारतांतल्या दिसपट्ट्या जिविताची, रस्त्यांची परिस्थिती आनी नागरी शिस्त हांची तिणें जपाना कडेन केल्ली तुळा जायत्या जाणांक पटल्या आनी जायत्या भारतीयांनी ताचेर “हें खरें” अशें मत उक्तायलां.
जपानांत फुटपाथाचेर चलप्यांकूय आदर
ते बायलेन बरयलां, “जपानांत फुटपाथाचेर चलप्याकूय आदर आनी सुरक्षीतताय मेळटा. थंय फुटपाथ निवळ, वेवस्थीत आनी सगळ्यां खातीर प्रवेश योग्य अशे आसात. उक्ते गटार नात, कोयर ना, सुण्यांचो भंय ना, दुचाकींची आडखळ ना. पूण भारतांत मात सगळ्यांक चलपाक सोंपो असो एकूय किलोमिटराचो फुटपाथ मेळटलो काय ना हाचो दुबाव आसा.”
गिरेस्त लेगीत रस्त्यांचेर सुरक्षीत नात
“हांव देशांतल्या पयल्या 1% कमावपी लोकां मदलीं आसा, पूण अजूनय दर दिसा रस्त्यांचेर म्हज्या जिविता खातीर भियेतां. पावसाच्या दिसांनी फोंडकुलां, उदकान भरिल्ले रस्ते हें एक दिसपट्टें झूज” अशेंय तिणें फुडें म्हणलां.
नितळसाण आनी शिस्त हांचे मदलो फरक
जपानांत पळयल्ली नागरी नितळसाण आनी शिस्त पळोवन तिका अजाप जालें. “थंय पावस पडटा, पूण चिखल ना, धुल्ल ना. थंय चलताना बेंगळुरू परस म्हजे बूट निवळ आशिल्ले. हाचेर विस्वास दवरप कठीण” अशें तिणें सांगलें.
आतां तिका आपल्या कारकिर्दीच्या सुरवातीच्या काळांत परदेशांत वचूंक नाशिल्ल्याचो पश्चाताप जाता. “लोक म्हणटात प्रतिभावान तरणाट्यांनी देशांत रावचें, पूण तांकां कित्याक आडावप, आमी तांकां कितें दितात?” असो प्रस्न ती विचारता. परतून संद मेळ्ळी जाल्यार एक खीणाचोय विचार करीनासतना देश सोडटली अशें स्पश्ट मत तिणें उक्तायलां.
लोकांचो तेंको
रेडिट वापरपी हजारांनी लोकांनी ह्या पोस्टाक तेंको दिलो. एकल्या वापरप्यान बरयलां, “दर खेपे हांव परदेशांत गेले उपरांत कळटा की आमी मुळाव्यो सुविधा नाशिल्ल्या वातावरणांत रावतात.” आनीक एकल्यान म्हणलां, “सिंगापूरांत बशी आनी एम्ब्युलन्सा खातीर वेगवेगळे लेन आसात. थंय लोक भौशीक येरादारी वापरतात. पूण हांगा सात सीटर गाडयो अॅम्ब्युलन्स लेगीत आडायतात.”
भारता खातीर ‘वेकअप कॉल’
ह्या व्हायरल पोस्टान भारतीय शारांनी वायट मुळावी सुविधा, वायट कोयर वेवस्थापन आनी चलत वचपी लोकांच्या असुरक्षितायेचो मुद्दो परतून चर्चेंत आयलां. कांय जाण म्हणटात की बदल ल्हवू ल्हवू घडटा, जाल्यार कांय जाणांक दिसता की संवसारीक पांवड्या परस ही उदरगत खूब ल्हवू आसा.
आतां खातीर निदान हे बायलेच्या भावनीक अणभवांतल्यान जायत्या भारतीयांच्या मनातल्या उदासीनतायेचे प्रतिबिंब थारता. एक सभ्य, निवळ आनी सुरक्षीत शारी जिवीत जगपाची इत्सा चड करून भारता भायर पुराय जाल्ली दिसता, अशेंय थोड्यांक दिसता.
(सुचोवणी: ही खबर रेडिटाचेर वापरप्यान घाल्ल्या अणभवाचेर आदारीत आसा. तिच्या दाव्यांचें स्वतंत्रपणान सत्यापन जावंक ना. लेखांत उक्तायिल्लीं मतां ते व्यक्तीचीं आसात.)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
