भांगरभूंय | प्रतिनिधी
पेडणें: आपले नर्सरींत अर्थान फार्म हावसांत फक्त फळां, फुलांचींच झाडां न्हय जाल्यार मसाले धरून कॅफी, कापूर, धूप, हिंग तयार करपीं झाडां मांद्रेंच्या देवूळवाड्या वयल्या देवेंद्र पार्सेकारान लायल्यांत. ह्या उपक्रमा वरवीं तांणी कृशी मळाचेर क्रांती केल्या.
खंयचें झाड पार्सेकार हांचे बागायतींत ना तें सोदचें पडटलें, अशे पद्दतीन तांणी आपले बागायतीचो वापर केला. जशीं तांणी फळां, फुलांचीं झाडां लायल्यात तेच तरेन तांणी कॉफीचें झाड, धूप, कापूर, हिंगाचें तशेंच साबुदाणें तयार करपा सारकीं वेगवेगळीं झाडां लायल्यांत.
पार्सेकार हांकां सध्या तांची भलायकी बरो सांगात दिना, तरी लेगीत आपल्याक फावता त्या वेळाचें ताणें भांगर केलां. 1970 पसून ताणें बागायतींत वेगवेगळीं झाडां लावपाक सुरवात केली. सध्या तांचे बागायतींत 200 परस अदीक चिकू, पणस, आंब्याचीं झाडां आसात. झाडां खातीर ताणें कसल्याच रसायनीक साऱ्याचो वापर करूंक ना जाल्यार सेंद्रीय सारें वापरलां. झाडांक फावोशें उदक मेळचें हे नदरेन तांणी कट्ट्यो, सोण्णां, चुडटां पुराय बागायतींत पातळावन दवरल्यात. झाडांच्या मुळांत दवरिल्ल्यान तांचें सारें जालां, तशेंच जमनींत ओलसाण तयार जाता आनी बागायतीक उण्या प्रमाणांत उदक लागता. हो उपक्रम फाटल्या 30 वर्सां सावन चल्ला.
पार्सेकार हांणी सुरवेक खडू करपाची ल्हानशी फॅक्टरी सुरू केल्ली. गोंयभरांतल्या शाळांक ह्या खडवांची ते पुरवण करतले. उपरांत तांणी ल्हवू ल्हवू बागायती कडेन लक्ष केंद्रीत केलें. ते खातीर बंगळुरू, हैद्राबाद, पुणे अशा प्रगतशील राज्यांनी वचून शेती विशीचें प्रशिक्षण घेतलें. थंय आशिल्ल्या वखदी झाडां वांगडाच हेर फळां, फुलांचीं झाडां आनी त्या झाडांचीं कलमां कशीं करपाक मेळटात, हाचेंय प्रशिक्षण घेवन ते गोंयांत आयले आनी कृशी मळार क्रांती घडोवचे खातीर पावल मारलें. आयज पार्सेकार हांचे बागायतींत लवंग, जायफळ, पत्री, मिरी, पणस, चिकू, पोपाय, कॉफी, कापूर, धूप, लसूण, हळद अश्या साबार झाडांचीं तशेंच फूल झाडांची कलमां आसात. सरकारी नोकरे फाटल्यान धांवा नासतना तांणी वेगवेगळ्या उपक्रमांतल्यान कृशी खात्याच्या विवीध येवजण्यांचो फायदो घेवन आपली बागायत फुलयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
