भांगरभूंय | प्रतिनिधी
पणजीः गोंयांतल्या काँग्रेस पक्षांत कांय मतभेद आसूं येतात. पूण 2027 वर्साचे विधानसभा वेंचणुकेंत भाजपाक हारोवपाक जाय जाल्यार मतभेद विसरून एकठांय येवपाक जाय अशें राज्य अध्यक्ष अमीत पाटकार हांणी स्पश्ट केलें. सोमारा बायलां काँग्रेसीच्या 41 व्या वर्साच्या निमतान आयोजीत केल्ल्या कार्यावळींत ते उलयताले. ह्या वेळार विरोधी पक्ष फुडारी युरी आलेमायेहू, खासदार विरियातो फर्नांडीस, प्रतिमा खलप, डॉ. प्रमोद साळगांवकार आनी हेर पदाधिकारी हाजीर आशिल्ले.
काँग्रेस हो एकूच पक्ष, जंय दरेका कार्यकर्त्याक आपलें मत उक्तेपणान उक्तें करपाक मेळटा अशें पाटकार हांणी सांगलें. भाजपाचे हुकूमशायेक लागून लोक थकले. राज्यांत बेकारी वाडल्या. बायलांचेर जावपी अत्याचार वाडत आसात. हाचे आड काँग्रेस पक्ष वेळोवेळ आवाज काडीत आयला. पक्षांतले वेगवेगळ्या विचारसरणीचे लोक 2027 वर्सा एकठांय भाजपाक हारोवंक सोदतात, हाचे खातीर बायलांची भुमिका म्हत्वाची आसतली. भाजपान फकत बायलां खातीर रितीं घोशणापत्रां केल्यांत.
बायलांक सुरक्षा आनी न्याय दिवपा खातीर काँग्रेस पक्ष बांदील आसा. सध्या 40 गटांतले 3 गट फुडारी बायलो आसात. आमी बेगीनूच 10 परस चड बायलां गट फुडारी आसपाचो यत्न करतले अशें पाटकार हांणी सांगलें. विधानसभा वेंचणुकेंत बायलांक प्राधान्य दितले अशें युरी आलेमांव हांणी सांगलें. काँग्रेसींतल्या बायलां सयत हेर सगळे घटक एकठांय येवन गोंय वाचवप शक्य आसा अशें तांणी सांगलें. भाजपान बायलां सत्तेचें नांव घेतलें पूण मंत्रीमंडळांत एकूय बायल ना अशी टिका तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
