भांगरभूंय | प्रतिनिधी
शिक्षक, मुख्याध्यापक, कर्मचाऱ्यां मदीं नोकऱ्यो वचपाची भिरांत
भांगरभूंय I प्रतिनिधी
पणजी : एक शिक्षकी तशेंच विद्यार्थी संख्या उणी आशिल्ल्या मुळाव्यो शाळा लागसारच्या शाळांनी विलीन करपा विशीं राज्य सरकारान हालचाली सुरू केल्यात. हाका ज्या पालकांनी विरोध केला, तातूंतल्या भोवतेक पालकांनी आपल्या भुरग्यांक खाजगी शाळांनी घातला. सरकारी मुळाव्या शाळांनी भुरगीं वचपी चडश्या पालकांचो सरकाराच्या निर्णयाक तेंको मेळटा.
मुळाव्या शाळांच्या विलिनीकरणा विशीं शिक्षण खात्यान हालींच परत एकदा मुख्याध्यापक संघटणे कडेन बसका घेतली. हे बसकेंत भुरगीं उणी आशिल्ल्या शाळांच्या विलिनीकरणा विशीं चर्चा जाली. तातूंत ह्या निर्णयाक विरोध करपी खाजगी शाळांनी वचपी विद्यार्थ्यांचे पालक चड आशिल्ल्याचे दिसून आयला.
दुसरे वटेन, सरकारान शाळांच्या विलिनीकरणाचो निर्णय घेतल्यार आपल्यो नोकऱ्यो वचपाची भिरांत संबंदींत शाळांतल्या शिक्षक तशेंच हेर कर्मचाऱ्यांनी पातळ्ळ्या. कांय जाणां कडल्यान ह्या निर्णयाक विरोध केल्ल्याचे मुख्याध्यापक संघटणेन शिक्षण खात्याच्या निदर्शनाक हाडून दिला, अशी म्हायती बसकेक हाजीर आशिल्ल्या एका अधिकाऱ्यान आमच्या प्रतिनिधी कडेन उलयतना दिली.
मजगतीं, हे विशीं शिक्षण संचालक शैलेश झिंगडे हांचे कडेन संपर्क केल्यार, सरकारी मुळाव्या शाळांच्या विलिनीकरणा विशीं सरकारान अजून कसलोच निर्णय घेवंक ना. मुख्यमंत्री डॉ. प्रमोद सावंत आयतारा दिल्लींत नीती आयोगाचे बसकेक हाजीर रावतले. ते गोंयांत आयले उपरांत शाळांच्या विलिनीकरणा विशीं निर्णय जावपाक शकता, अशें तांणी सांगलें. हे विशीं शिक्षण खात्याच्या अधिकाऱ्यांची शिक्षक, पालकां कडेन चर्चा सुरू आशिल्ल्याचे तांणी नमूद केले.
विलिनीकरणा उपरांत मुख्याध्यापकांचे कितें?
सरकारान ज्या मुळाव्या शाळांच्या विलिनीकरणाचो विचार सुरू केला, तातूंतल्या जायत्या शाळांक मुख्याध्यापक आसात. ताका लागून शाळांचे विलिनीकरण जाले उपरांत एके शाळे खातीर दोन मुख्याध्यापक दवरतले व्हय? हे विशीं कितें धोरण चालीक लायतलें हे सरकारान अजून स्पश्ट करूंक नाशिल्ल्यान जायत्या शाळांच्या मुख्याध्यापकांनी भिरांत उक्तायल्या, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
