भांगरभूंय | प्रतिनिधी
रवींद्र वेळीप: 2001चे जनगणने प्रमाण जातली प्रक्रिया
मडगांव: गोंयांतल्या एसटी समाजाक राजकी आरक्षण मेळ्ळां. कायद्या प्रमाण 2001चे जनगणने प्रमाण गोंयांतले चार मतदारसंघ एसटी समाजा खातीर आरक्षीत जातले. मतदारसंघ फेररचणुकेचो हातूंत विशय ना. ताका लागून राजकी आरक्षणांत कसलीच आडखळ ना अशें गाकुवेधचे कायदेशीर सल्लागार रवींद्र वेळीप हांणी सांगलें.
एसटी समाजांतल्या राजकी आरक्षणांत मतदारसंघ फेररवणुकेचो विशय येना अशें गाकुवेधचे रवींद्र वेळीप हांणी स्पश्ट केलें. एसटी राजकी आरक्षणाच्या कायद्यांत खंयच्याय मतदारसंघाचे रचणुकेंत बदल करचे नात. जाल्यार गोंयांतल्या 40 मतदारसंघांतल्या खंयच्याय चार मतदारसंघाची निवड करपाची आसा. हाचे सगले अधिकार वेंचणूक आयोगाक दिल्यात.
कायद्या प्रमाण जनगणना ही 2001 ची ग्राह्य धरची. 2011 वा ताचे मुखार जावपी जनगणनेचो अहवाल गृहीत धरचो अशें म्हणिल्लें ना. संविधानांतले तरतुदी प्रमाण ह्याच कायद्या प्रमाण उत्तर प्रदेश आनी हेर राज्यांनी अंमलबजावणी केल्या. कायद्या प्रमाण 2001 ची जनगणना ग्राह्य धरून एसटी समाजाच्या मतदारसंघांतले लोकसंख्येचो विचार करून मतदारसंघांत आरक्षण दवरतले. हातूंत कसलीच कायदेशीर आडखळ ना अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
