भांगरभूंय | प्रतिनिधी
भांगरभूंय । प्रतिनिधी
पणजीः चवथीच्या निमतान नागरी पुरवण आनी गिरायक वेवहार खात्यान सार्वजनिक गणेश मंडळाचे पेंडलांनी खाशेली इ-केव्हायसी शिबिरा घडोवन हाडली. आतां मेरेन खात्यान अशी पांच खाशेली शिबिरां घडोवन हाडल्यात. ह्या शिबिरांत लावार्थ्यांचो व्हडा प्रमाणात प्रतिसाद मेळ्ळो.
सवाय आनी फुकट राशन हे लावार्थ्या मेरेन पावचे आनी ताचो दुरूपयोग जावचो न्हय हे खातीर केंद्र सरकारान राशन कार्डा खातीर इ-केव्हायसी सक्तिची केला. जर वेळा भितर राशन कार्डाची इ-केव्हायसी करुंक ना जाल्यार राशनाचे लाव बंद करपाची शिटकावणी सरकारान दिल्या. हे फाटभूयेंर खात्यान इ-केव्हायसी करपाचे प्रक्रियेक नेट दिला.
नागरी पुरवण खातें आनी थळावे भौशीक गणेशोत्सव मंडळाच्या जोडपालवान परबेच्या वेळार पांच खाशेली इ-केव्हायसी शिबिरा घडोवन हाडल्यात. जे लोक देवाचे दर्शन घेवपाक येतात तेन्नाच तांच्या राशन कार्डाची इ-केव्हायसी अधिकारी करून घेतात.
फोंडें म्हालातले तिस्क उसगांवा भौशीक गणेशोत्सव मंडळाचे पंडलात उसगांव गांजे पंचायतीच्या सोसायटी धनयांनी शिबिर घडोवन हाडिल्ले. दुसरे शिबिर शिरोड्यां भौशीक गणेशोत्वस मंडळाचे पंडलात आदर्श व्हीकेएस सोसायटीच्या सहकार्यना घडोवन हाडिल्ली. जाल्यार तिसरे शिबिर फोंडें कंज्युमर कॉपोरेटीव्ह सोसायटी लि हांचेनी बुधवार पेठ भौशीक गणेशोत्सव मंडळाचे जोडपालवान अपर बाजार फोंडें घडोवम हाडिल्ले.
जाल्यार चवथे शिबिर केपेंच्या नागरी पुरवण विभागान भौशीक गणेशोत्सव मंडळाचे पंडलात केपें हांगा घडोवन हाडिल्ले. हे शिबिर दोन दीस चलिल्ले. जाल्यार पांचवे शिबिर मुरगांवचो राजा भौशीक गणेशोत्सव मंडळाचे पंडलात मुरगांव म्हालांतल्या नागरी पुरवण विभागान घडोवन हाडिल्ले.
सणा परबाचे निमतांन ह्यान फुडें अशी खाशेली शिबिरा घेवपाची मोख नागरी पुरवण खात्यान दवरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
