आयटीआयक बरे दीस

भांगरभूंय | प्रतिनिधी

गोंयांत आयटीआय सुरू जाल्यो तेन्ना तांकां विद्यार्थी मेळनाशिल्ले. धावेंत जे कोण काठार पास जाताले वा नापास जातकच आॅक्टोबरांत परिक्षा दिवन पास जाताले, तेच आयटीआयक वताले. मात, 30-35 वर्सांच्या काळांत शिक्षणाचे न्हंयेंतल्यान बरेंच उदक व्हांवन गेलां. पदवी घेवन बरी नोकरी मेळत हाची खात्री ना. देखून विद्यार्थी पदवी पुराय करपाच्या बदला अभियांत्रिकी, दोतोरकी, आयटी फांट्यांनी प्रवेश मेळोवपाचो यत्न करतात. शिकपांत सादारण आसात, ते इकरावेक वेवसायिक अभ्यासक्रमाक वतात आनी उरिल्ले आयटीआयक! कुशळटाय अभ्यासक्रम शिकल्यार नोकरी मेळटली, निदान स्वताचो वेवसाय सुरू करपाक मेळटलो, हे आशेन. पूण, आतां तातूंत बदल जाल्ल्याचें दिसता. म्हणल्यार धावेंत विशेश श्रेणींत पास जाल्ले विद्यार्थीय आयटीआयक वचपाक लागल्यात. शिक्षणा विशींचो लोकांचो दृश्टीकोण बदलता, ही खोशेची गजाल.
अंदूं आयटीआयंत प्रवेश घेतिल्ल्या विद्यार्थ्यां मदले 434 म्हणल्यार 60 टक्के विद्यार्थी 75 टक्क्यां परस चड गुण घेतिल्ले आसात. विशेश श्रेणींत पास जाल्ले विद्यार्थी आयटीआयंक प्रवेश घेवपाक लागले जाल्यार ह्या कुशळटाय अभ्यासक्रमांचें आकर्शण हाचे मुखार वाडटलें. आयटीआयचो दर्जोय सुदारतलो. तिका प्रतिश्ठा येतली. अंदूं 42 नवे अभ्यासक्रम सुरू जाल्यात. आयटीआयंत प्रवेश मेळपाक वशिले लावपाचे पडटात. ना अशें न्हय, पूण विज्ञान फांट्यांतूय सहज प्रवेश मेळपाक शकता, अशें विद्यार्थी हांगा येवपाक लागल्यात, ही शिक्षण तज्ञांनी विचार करपा सारकी गजाल.
गोंया सारक्या राज्यांत म्हारगाय मळबाक तेंकल्या. हांगाची जिणेशैली, एकूणच राहणीमान देशांतल्या पयल्या पांचांत येता. ‘खाओ, पिओ, मजा करो’ धर्तेर खुशालभरीत जिवीत जगतलो जाल्यार उंचेल्या पगाराची नोकरी वा बरे येणावळीचो वेवसाय जायच. देखून गोंयकार शक्य तितले बेगीन नोकरी मेळोवपाचो यत्न करता. सरकारी नोकरे फाटल्यान सगलेच धांवतात, हेंय ताचे फाटलें कारण. कारण चडश्यांक ती नोकरी चड पगाराची आनी कमी कामाची अशें दिसता. देखून लाखांनी रुपया दिवन (खरें म्हणल्यार त्या पयशांनी वेवसाय करूं येता) तरणाटे सरकारी नोकरी हातासपाचो यत्न करतात. आयटीआयंत कुशळटाय अभ्यासक्रम शिकयतात. देखून सोंपेंपणी नोकरी मेळपाची संद आसता. घरचो वेवसाय आसल्यार तो वाडोवं येता. हाकाच लागून फाटल्या कांय वर्सांनी आयटीआयच्या मोगांत पडपी गोंयकार विद्यार्थ्यांचो आंकडो वाडला.
आयटीआयंत शिक्षण मेळटा तें रोजगारात्मक. हो काळ मोबायल फोन, संगणकाचो. ह्या मळाचेर शेंकड्यांनी नोकऱ्यो आसात. ड्रोन मळ विकसीत जायत आसा. ताचे दुरुस्ती खातीर तंत्रज्ञ जाय पडटले. इलेक्ट्रीक गाडयांचें प्रमाण वाडत आसा. ताचे मॅकानिक जाय. फुडल्या पांच वर्सांनी तांकां बरे दीस येतले. बाजारांत ज्या अभ्यासक्रमाक मागणी आसा, ताचें मार्गदर्शन गोंयकार विद्यार्थ्यांक जावप गरजेचें. शाळांनी आठवे यत्ते सावन तें सुरू जाल्यार बरें. शिक्षण तज्ञ, वेवसाय मार्गदर्शकांनी ह्या कामांत माथें मारपाक जाय. नोकरे परस वेवसायांत चड पयसो आसा, हें वेगळें सांगपाक नाका. सरभोंवतणची परिस्थिती पळयल्यार दरेकल्याक हें स्वताच पळोवपाक मेळटलें. अशे साबार ल्हान – व्हड वेवसाय, धंदे आसात, जंय गोंयकार सहसा दिसनात. गोंयांत रोजगाराच्या मळाचेर खूब संद आसा. देखून दर दिसा रेल्वेचे डबे भरून हेर राज्यांतले लोक हांगा येतात. ते करतात, तातूंतले कांय रोजगार तरी गोंयकार तरणाटे सहज करपाक शकतले.
देशभरांतल्या तरणाट्यां मदीं आशिल्ली कुशळटाय विकसीत जावची. तांकां नोकरी मेळची हे खातीर केंद्र सरकार फाटलीं कांय वर्सा वावुरता. कुशळटाय उदगत कार्यावळी खाला (स्कील इंडिया) सरकारान पदविका, पदवी, पदव्युत्तर अभ्यासक्रम पसून तयार केल्यात. तातूंत शेती, अभिनय, योग, फोटोग्राफी, पर्यटन, फॅशन अशे जायते अभ्यासक्रम आसात. वर्साची वर्सां बेकार बसून रावचे परस वा उण्या पगाराची नोकरी करचे परस स्वता भितर लिपिल्ली कला, कुशळटाय विकसीत करून आपरोजगार केल्यार संबंदीत व्यक्तीची जीण सुदारतलीच, पूण आमच्या देशाचीय उदरगत जातली, हातूंत दुबाव ना. ते खातीर कुशळटाय, रोजगाराभिमुख प्रशिक्षण दिवपी आयटीआय संस्था बळिश्ट करची पडटली. ते दीस सुरू जाल्यात.