सवाय दरांत नाल्ल तीन दिसांत सोंपले

भांगरभूंय | प्रतिनिधी

-फलोत्पादन म्हामंडळाच्या अनुदानीत दरांत नाल्ल विकपाच्या उपक्रमांक बरो प्रतिसादपणजीः राज्यात नाल्ल अनुदानीत दरात दिवपाच्या गोंय फलोत्पदान महामंडळाचे उपक्रमाक बरो व्हडलो प्रतिसाद मेळला. कर्नाटकातल्यान हाडील्ले सगळे नाल्ल तीन दिसा भितर खपल्यात. महामंडळान दिल्ले सवाय नाल्लांक लागून बाजारात हाचो परिणाम जावन बाजारात नाल्लांचे दर बरेच देवल्यात, अशीं म्हायती गोंय फलोत्पादान महामंडळाचे वेवस्थापकी संचालक चंद्रहास देसाय हांणी दिली.

चवथी आदीं वाडपी नाल्लांची मागणी आनी बाजार दर थीर करपाक गोंय सरकार अनुदानीत दारात नाल्ल विकपाचो निर्णय घेतील्लो. बाजारात विकपी मोठो आकाराचो नाल्लांची जे दर 60-70 रुपया इतली आसली त्याच आकाराचो नाल्ल गोंयकारांक 45 रुपयांनी मेळटा. ‘ना फायदो, ना लुकसाण’ ह्या तत्वाचेर ह्या तत्वाचेर हे नाल्ल शेजारी कर्नाटक राज्यातल्यान शिमोगा वाठारातल्यान विकते घेवन ते महामंडळाचे विक्री केंद्रानी विकपाक दवरल्यात.

हे विशींची अदीक म्हायती दितना महामंडळाचे वेवस्थापकी संचालक चंद्रहास देसाय हांणी सांगले की महामंडळान 14 ओगस्टांक 25 हजाल नाल्ल कर्नाटकाच्या शिमोगा वाठारातल्यान मागयल्ले. हे नाल्लांक मागणी इतली आयली की तीन दिसा भितर हे नाल्ल सोपले.

सोमारा रातया शिमोगा सावन अतिरीक्त 25 हजार आनीक नाल्ल गोंया पावतले आनी हे नाल्ल येता दिन दिसा भितर खपतले अशी आमका आस्त आसा. हे नाल सोपले जाल्यार आनीक नाल्ल मागोवपाची आमची तयारी आसा. चवथी उपरांत आमी आनीक 25 हजार नाल्ल मागोवपाचे आसात, अशी म्हायती देसाय हांणी दिली.

आमी 45 रुपयान दिता तो नाल्ल पळोवन बाजारात हाचो परिणाम जावन नाल्लाचे दर बरेच उणे जाल्यात. महामंडळान बाजारात खुपशे कडेन चवकशी केले उपरांत कळून आयला की जे नाल्ल 60 ते 70 रुपयांनी विकताले तेच नाल्ल आता 40 रुपयांनी लोक विकपांक लागल्यात. आमी हे नाल्ल शिमोगातल्यान 40 रुपया नग इतले विकते घेता. पुण विक्री केंद्राचे धनयांक किते फायदो सुटचो म्हण 5 रुपया चड घेवन 45 रुपयान आमी विकतात, अशें देसाय हांणी म्हणले.

पावसांक लागून नाल्लाचे दर तेंगशेर आसात. संप्टेबर मेरेन पावसाचो नेट सोपले उपरांत हे दर नियंत्रीत जावपाची शक्यता आसा. फक्त चवथी खातीर लोकांक थाकाय दिवपा खातीर चवथीच्या 11 दिसा मेरेन आमी भायले नाल्ल हाडून सवाय भितर विकपाचो उपक्रम हातांत घेतील्लो. जर चवथी उपरांतय जर नाल्लाचे दर देवनात तर ही येवजण चवथी उपरांतय चालू दवरपाचेर आमी विचार करतले, अशीं म्हायती देसाय हांणी दिली.