भांगरभूंय | प्रतिनिधी
आदल्या तेंपार लोअर केजी, अपर केजी असले प्रकार नासताले. भुरग्यांक पिरायेचीं पांच (केन्नाय स) वर्सां जालीं काय शाळेंत घालताले. 14 व्या वर्सा तो धावे यत्तेंत पावतालो. कांय भुरग्यांचें एक वर्स हेवटेन तेवटेन जातालें. कालांतरान शिक्षणाच्या मळाचेर पयसो आयलो. भुरग्याचे दोगूय पालक नोकरी करपाक लागले आनी ल्हान पिरायेच्या आपल्या पुताक, धुवेक शाळेंतूच दवरपाचो वेळ आयलो. मागीर क्रॅशे, लोवर केजी, अप्पर केजी अशे वर्ग सुरू जाले. अर्थांत भरपूर फी घेवन! सरकारी पांवड्याचेर आंगणवाडी, बालवाडी सुरू आशिल्ल्यो. थंय भुरगींय वतालीं. पूण, कुटुंबां अर्थीक नदरेन सुदारलीं आनी ल्हवू ल्हवू भुरग्यांनी ‘केजी’ ची वाट धरली. थंय इंग्लीश शिक्षण दिताले, हेंय एक आकर्शण आशिल्लेंच. कोरोना काळांत हे ल्हान भुरग्यांचे वर्ग बंद आशिल्ले. आतां ते परत चालू जाल्यात. फाटल्या कांय वर्सांचेर नदर मारल्यार आंगणवाडी आनी चवथी यत्ते मेरेन शिक्षण दिवपी सरकारी शाळांनी परप्रांतीय भुरगींच (कांय आडवाद आसात.) वतना दिसतात. हेरांची भुरगीं खाजगी शाळांनी. खास करून इंग्लीश माध्यमांच्या! प्रादेशिक भाशांतल्यो जायत्यो शाळा विद्यार्थी नाशिल्ल्यान बंद पडपाच्या मार्गार आसात. खुद्द सरकारान अडेचशे शाळा बंद करपाचो आनी थंयच्या विद्यार्थ्यांक लागसारच्या शाळांनी हालोवपाचो विचार चलयला. ताका अर्थांत शिक्षण तज्ञांचो विरोध आसा. दुसरे वटेन बऱ्योच शाळा एक शिक्षकी आसात. म्हणल्यार सगले विशय एकलोच शिकयता. आंगणवाडी भाड्याच्या कुडींनी आसात. अर्थीक नदरेन हें परवडचें ना म्हूण शिक्षण विभागान पयरूच एक परिपत्रक काडलां. तातूंत तांणी उच्च माध्यमिक विद्यालयांनी आपापल्या वाठारांतली एक तरी आंगणवाडी दत्तक घेवपाचो उलो शाळा वेवस्थापनांक मारला.
फाटल्या कांय वर्सां सावन भोवतेक माध्यमिक, उच्च माध्यमिक विद्यालयांनी स्वताचे शिशुवर्ग सुरू केल्यात. आंगणवाडींनी वचपी भुरग्यांच्याच पिरायेचीं भुरगीं थंय शिकतात. त्या वर्गांक नांव वेगळें आसा. म्हणटकच थळाव्या शाळांचीं वेवस्थापनां गांवांतली आंगणवाडी दत्तक घेवपाक तयार जायत हाची 100 टक्के खात्री दिवंक मेळची ना. तयार जालीं जाल्यार बरेंच आसा. सध्या राज्यांत 1262 आंगणवाड्यो आसात. आनीक 60 रोखड्योच सुरू जातल्यो. 750 चें भाडें सध्या सरकाराक भरचें पडटा. शारांनी 125 तर गांवांनी 625 आंगणवाडी. वट्ट 1 कोटी 35 लाख रुपया भाडें. सरकारी शाळा, इमारतींनीय आंगणवाडी आसात. हो खर्च उणो करपाचें सरकारान थारायलां. देखून हो आंगणवाडी पोसूंक (दत्तक) दिवपाचो उपक्रम. त्या ल्हान भुरग्यांक हेर विद्यार्थ्यांक मेळटात त्यो सुविधा मेळच्यो, होय उद्देश आसाच. आतां बाॅल उच्च माध्यमिक शाळा वेवस्थापनांच्या रिंगणांत आसा.
गोंयांतल्यो कांय खाजगी शाळा मुखेल रस्त्या कुशीक आसात. ताका लागून त्या वाठारांत सकाळ- दनपार येरादारीची कोंयडी जाता. सगल्याच पालकांनी हें अणभवलां आसतलें. पिरायेन ल्हान आशिल्ल्यान ह्या भुरग्यांक हाड, व्हर करचें पडटा. अपघात जावं येतात. तेन्ना येरादारी खातें, पुलिसांनी हाचेर उपाय काडूंक फावो. हो जालो आंगणवाडींचो प्रस्न. शाळांचें कितें? अडीचशें शाळांनी 15 परस कमी विद्यार्थी आसात. कांय कडेन चड शिक्षक आसात, तर 27 शाळांनी एक शिक्षक. तातूंत नव्या कोंकणी, मराठी शाळां खातीर सरकारा कडेन फाटलीं 5-6 वर्सा दोनशां वयर अर्ज पडून आसात. तांकां अजून परवानगी मेळपाची आसा. मायभाशेंल्यान मुळावें शिक्षण हो संवसारीक सिद्धांत. सगल्या शिक्षण तज्ञांनी तो मानून घेतला. मात वेव्हारीक विचार करपी पालकांक तो मान्य ना. इंग्लीश येना जाल्यार नोकरी मेळप कठीण, अशें तांचें मत. आतां आंगणवाडी दत्तक वचपाच्यो आसात, थंय शिक्षणाचें माध्यम अर्थांत कोंकणी, मराठी आसा. कांय वेवस्थापनां आपल्या शाळांनी केजीचे वर्ग प्रादेशिक भाशांनी शिकयतात. उरिल्लीं इंग्लिशींत. म्हणटकच दत्तक घेतिल्ल्या आंगणवाडींक थंय जुळोवन घेता म्हणसर कांय दीस लागतले.
तरीय राज्या वयलें अर्थिक वजें उणें करपाचे नदरेन हो ‘दत्तक आंगणवाडी’ चो निर्णय बरो आसा. सरकारी शाळांच्यो रिकामी इमारती भाड्यान दिवपाचेंय फाटीं थारिल्लें. निर्णय जातात, मात ते चालीक लागपाक जाय आनी मुख्य म्हणल्यार ते येशस्वी जावपाक जाय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
