भांगरभूंय | प्रतिनिधी
पणजी: पुलीस खात्यांत पुलीस उपनिरिक्षकाची (पीएसआय) 187 पदां खातीर काल (आयतारा) 4200 उमेदवारांनी सीबीटी परिक्षा दिली. हे परिक्षेच्या निकालाचेर आदारीत निवडक उमेदवाराची शारिरीक परिक्षा जातली. हाचे उपरांत दुसरी सीबीटी परिक्षा जातली. दुसऱ्या सीबीटी परिक्षे उपरांत भरती जातली.
तंत्रीक सहाय्यक, शिक्षकां सयत पीएसआयचीं पदां भरपा खातीर आयोगान 2 मेक जायरात दिल्ली. अर्जांची छाननी केले उपरांत पात्र उमेदवारां खातीर पयली सीबीटी परिक्षा जाली. उत्तर गोंयांत आग्नेल इन्स्टिट्यूट ऑफ टेक्नोलॉजी (आसगांव) आनी सेंट झेवियर म्हाविद्यालय, म्हापशें हांगा परिक्षा जाली. दक्षीण गोंयांत डॉन बॉस्को अभियांत्रिकी म्हाविद्यालय (फातोड्डें), रोजरी म्हाविद्यालय (नावेली) आनी एनआयटी (कुंकळ्ळी) ह्या केंद्रांनी परिक्षा जाली. 187 पदांं मदीं 30 पदांं बायलांं खातीर राखीव आसात. दादल्यांं खातीर 157 पदांं आसात. दादल्यांं खातीर जी 157 पदांं आसात, तातूंत एससी 3, एसटी 19, ओबीसी 41, इडब्लूएस खातीर 14 पदांं राखीव आसात. तशेंच 157 पदांंतल्यान एक्स सर्वीसमेना खातीर 4 जाल्यार खेळगड्यांं खातीर 8 पदांं राखीव आसात.
बायलांं खातीर जीं 30 पदांं राखीव आसात, तांंतूतलीं 3 पदांं खेळगड्यांं खातीर राखीव आसात. तशेंच एसटी 3, एससी 1, ओबीसी 9 जाल्यार इडब्ल्यूएस खातीर 3 पदांं राखीव आसात. पीएसआय पदा खातीर पिराय 28 मेरेन आसूंक जाय. सरकारी कर्मचाऱ्यांं खातीर नेमा प्रमाण 5 वर्सांची सूट मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
