सगळ्यांनी स्वदेशी वस्तूंचो वापर करचो: कामत
भांगरभूंय | प्रतिनिधी
मडगांवांत म्हत्वाचें खादी केंद्र तयार करतले
मडगांवः खादी ही एक स्वदेशी चळवळ. सगळ्यांनी खादी उत्पादनां विकतीं घेवचीं आनी खादी उद्देग वाडचो. हे खातीर केंद्र सरकारुय यत्न करता. देखून सगल्यांनी देशी उत्पादनां वापरपाचेर लक्ष केंद्रीत करचें अशें आमदार दिगंबर कामत हांणी सांगलें. मडगांवांत म्हत्वाचें खादी केंद्र तयार करपा खातीर वावुरतलें अशें तांणी स्पश्ट केलें.
गोंय खादी आनी ग्रामीण उद्देग मंडळान मडगांवच्या रवींद्र भवनांत गोंय खादी आनी ग्रामीण उद्देग उत्पादनांचें प्रदर्शन आनी विक्री उपक्रम सुरू केलां. हें प्रदर्शन 9 ऑगस्ट ते 11 ऑगस्ट मेरेन आसतलें. मडगांवचे आमदार दिगंबर कामत, जीकेव्हीआयबीचे अध्यक्ष आनी आमदार आंतानियो वाझ, उपाध्यक्ष सर्वानंद भगत, मुखेल कार्यकारी अधिकारी जॉन्सन फर्नांडिस, विजेंदर सिंग आनी मंडळाचे हेर वांगड्यांच्या हाजिरेंत प्रदर्शनाचें उक्तावण जालें. ह्या वेळार आमदार आंतानियो वाझ हांणी खादी ग्रामीण उद्योगां खातीर वेगवेगळ्यो येवजण्यो आसात. सध्या खादीची मागणीय वाडत आसा अशें सांगलें. मंडळाच्या वेगवेगळ्या येवजण्यांचो फायदो घेवपाचो उलो तांणी केलो.
बायलांच्या वस्तूं खातीर बाजारपेठेची गरज: कामत
‘वोकल फॉर लोकल’ ही संकल्पना केंद्र सरकारान सुरू केल्या. ताका बरो प्रतिसाद मेळटा. बायलांक आनी थळाव्या लोकांक अजून योग्य बाजारपेठ मेळूंक ना. बरो म्हाल आसता तांकां बाजाराची गरज आसता. सगळ्यांनी प्रचार केलो जाल्यार खादी उद्देग वाडूंक शकता. बायलो सशक्त जाल्यार पुराय कुटुंब सशक्त जाता. हे खातीर मडगांवांतल्या वेगवेगळ्या पंगडां खातीर प्रशिक्षण आनी हेर कार्यावळी सुरू करतले. तशेंच सगळ्यांच्या सहकार्यांतल्यान मडगांवांत एक म्हत्वाचें खादी केंद्र तयार करतले अशें आमदार कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
