जिणेंत येसस्वी जावपाक वाचन म्हत्वाचेंः मुख्यमंत्री

भांगरभूंय | प्रतिनिधी

‘रीड इंडिया’ सेलिब्रेशन महोत्सवाचो गोंयांत शुभारंभ

भांगरभूंय I प्रतिनिधी
पणजी : जिणेंत येसस्वी जावपाचे आसत जाल्यार वाचन गरजेचें. वाचनान मनशाचो मेंदू प्रगल्भ जाता. डॉ. बाबासाहेब आंबेडकर हांच्या ‘वाचाल तर वाचाल’ ह्या संदेशाची याद करून दरेकल्यान ते प्रमाण मार्गक्रमण करप गरजेचें, अशें मुख्यमंत्री डॉ. प्रमोद सावंत हांणी सांगलें.
प्रुडंट मिडिया, रीड इंडिया, गोंय मुख्याध्यापक संघ आनी प्रिन्सिपल फोरम हांच्या जोड पालवान शुक्रारा दोनापावला सिदाद द गोवा हॉटेलांत आयोजीत ‘रीड इंडिया सेलिब्रेशन’ महोत्सवाच्या शुभारंभ सुवाळ्यांत मुख्यमंत्री मुखेल सोयरे ह्या नात्यान उलयताले.
ह्या वेळार तांचे वांगडा ‘रीड इंडिया सेलिब्रेशन’चे संस्थापक रघुराम अनंतोज, ज्ञानपीठकार दामोदर मावजो, शिक्षण संचालक शैलेश झिंगडे आनी प्रुडंट चॅनलाचे संपादक प्रमोद आचार्य हाजीर आशिल्ले.

गोंयान जायते दर्जेदार लेखक देशाक दिल्यात. गोंयांत शंबर वर्सां पसून वाचनाची संस्कृताय आसा. ताचे दाखले शंभर वर्सांच्या पयलीं पसून गोंयांत सुरू आशिल्ल्या वाचनालयांतल्यान मेळटात. वाचन संस्कृतीचें गोंयान सदांच संवर्धन केलां. पूण फाटल्या कांय वर्सांत वाचनाची आवड उणी जायत चल्ल्या. अशें स्थितींत शाळांतल्या शिक्षकांनी फुडाकार घेवन विद्यार्थ्यां मदीं शालेय जिणे पसुनूच वाचनाची आवड निर्माण करप आनी तांकां ताची संवय लावप म्हत्वाचें, अशेंय मुख्यमंत्री डॉ. प्रमोद सावंत हांणी म्हणलें.
‘रीड इंडिया’ ही वाचनाचे नदरेन सकारात्मक संकल्पना आसून, ती चालीक लावपी गोंय राज्य आदर्श थळ जावपाक शकता, अशें ज्ञानपीठकार दामोदर मावजो हांणी म्हणलें. वाचनान मनशाचो मेंदू प्रगल्भ जाता, विकसीत जाता. नैतिकता आनी नैतीक मुल्यां वाचनांतल्यानूच मेळटात. बरो मनीस घडोवपाक शालेय शिक्षण गरजेचें. शालेय शिक्षणा वांगडाच हेर वाचन लेगीत तितलेच म्हत्वाचें, अशें मावजो हांणी म्हणलें. भारत देश ज्ञान आनी शिक्षणाचें केंद्र आसलें, तरी अभ्यासा खेरीत हेर पुस्तकां वाचपाची संवय भारतियां मदीं उणीं जायत चल्ल्या. फक्त पांच मिणटांचें वाचन लेगीत फुडल्या पांच वर्सांत भारतांत बदल घडोवन हाडपाक शकता, असो विस्वास ‘रीड इंडिया’ चे संस्थापक रघुराम अनंतोज हांणी उक्तायलो. दरेक येसस्वी मनीस हो बरो वाचक आनी स्वतंत्र विचारसरणीचो आसता. वाचनान मनीस गिन्यानी जाता. ताचें मदीं सकारात्मकता येता. ते भायर मनशाचे सर्वांगी व्यक्तीमत्वाची उदरगत शिक्षणाक लागून जाता. ते खातीर दरेकल्यान जिणेंतलो मात्सो वेळ कुशीक काडून विवीध प्रकारांचे वाचन करपाक जाय, अशेंय तांणी नमूद केले.
‘रीड इंडिया सेलिब्रेशन’ ही भारतांतली वाचनाची संवय पुनरुज्जीवीत करपाची चळवळ आसा. हे चळवळीक गती दिवपाक जागतीक भाशां वांगडाच प्रादेशीक भाशांचेरूय आमकां विशेश भर दिवपाचो आसा, अशेंय रघुराम हांणी स्पश्ट केले.
आयज आमी अशा युगांत आसात जंय आमी साहित्य वाचपाक शकतात, तशेंच ते पळोवंक वा आयकूंक शकतात. पळोवप पुराय बंद करिनासतना विद्यार्थ्यांनी वाचनाचेर चड भर दिवपाक जाय. ह्या कामांत शिक्षकांची भुमिका म्हत्वाची, अशें प्रुडंट चॅनलाचे संपादक प्रमोद आचार्य हांणी सांगलें.
मजगतीं, हे कार्यावळीक राज्यभरांतल्यान सुमार चारशें शिक्षकांची हाजेरी आशिल्ली. कोरोना काळांत रातदीस काम करून ऑनलायन पद्दतीन शिक्षणाची गंगा विद्यार्थ्यां मेरेन पावोवपी शिक्षकांचो मानेस्तांचे हस्तुकीं भोवमान जालो.

‘रीड इंडिया’ प्रधानमंत्री मोदी मेरेन पावयतले
प्रधानमंत्री नरेंद्र मोदी हांणी आतां मेरेन ‘क्लीन इंडिया’, ‘स्किल इंडिया’, फीट इंडिया’, तशेंच ‘मेक इन इंडिया’ अशाे विवीध मोहिमो चालीक लायल्यात. ते उपरांत रघुराम हांणी वाचन संस्कृताय अबाधीत दवरून मनशाक वैचारीक नदरेन समृद्ध करपाक ‘रीड इंडिया’ मोहीम सुरू केल्या, ते विशीं आपूण तांचे खासा अभिनंदन करता, अशें मुख्यमंत्री डॉ. प्रमोद सावंत हांणी म्हणलें. रघुराम हांच्या कार्याची म्हायती आपूण पत्रा वरवीं प्रधानमंत्री नरेंद्र मोदी हांचे मेरेन पावयतलो. रीड इंडिया मोहिमेक घटाय दिवपाक संघटीत यत्नांची गरज आशिल्ल्याचेय मुख्यमंत्री डॉ. सावंत हांणी नमूद केले.