भांगरभूंय | प्रतिनिधी
विदेशांतले गोंयकार परतूंक लागल्यात गोंयांत
भांगरभूंय । प्रतिनिधी
पणजी : परदेशांतले तणावाचे जिणेपद्दतीक लागून, नोकरेची फावो ती संद नाशिल्ल्यान, भलायकेचे त्रास आनी कुटुंबीक ओड हाका लागून जायते गोंयकार स्थलांतरितांनी (गोंया भायर रावपी) आपल्या मूळ गांवाक (गोंय) परत येवपाचें थारायलां. युरोप, आखात, अमेरिके सारक्या जायत्या देशांनी स्थायीक जाल्ल्या गोंयकारांनी ‘सपनां फुटून मातये भरवण’जाल्ल्याचें अणभवलां आनी आतां ते आपल्या मूळ गांवांनी परतूंक लागल्यात.
गोवा बिझनेस स्कूल, गोंय युनिव्हर्सिटी आनी फादर आग्नेल आर्ट्स अँड कॉमर्स कॉलेज, पिलार हांणी केल्ल्या संयुक्त अभ्यासा वरवीं हे वास्तव उक्तें जालां. ह्या अभ्यासांत रॉय गोम्स आनी सारथ चंद्रन हांणी गोंयांत परतून आयिल्ल्या 400 स्थलांतरीत लोकांची म्हायती एकठांय केला. उण्यांत उणें पांच वर्सां परदेशांत ‘प्राॅडक्टीव्ह’ काम केल्ल्या आनी उपरांत गोंयांत परतून आयिल्ल्या ह्या लोकांक ‘रिटर्न मायग्रंट’ अशें म्हणटात.
मध्यम पिरायेचे गोंयकार चड
ह्या अभ्यासा प्रमाण परतून येवपी स्थलांतरीत लोकांचो आंकडो सगळ्यांत चड 46- 50 वर्सां पिराय गटांत आसा. ताचे उपरांत 51- 55 आनी 41- 45 वर्सां पिराय गटांत आसा. जिणेंत स्थिरताय आनी निवृत्ती ह्या पांवड्यार पाविल्ले लोक चड प्रमाणांत परतून येतात, अशें ह्या पिराय गटांतल्यान दिसून येता.
कामाच्या सुवातेर असमाधान
परदेशांतलें अस्थीर आनी ताण आशिल्लें कामाचें वातावरण, करियरांत उदरगतीचो उणाव, नोकरेंतली असुरक्षीतताय, उणी भलायकी सुविधा, भेदभाव हाका लागून स्थलांतरीतां मदीं अस्वस्थताय निर्माण जाल्या. ते भायर स्वताच्यो वा कुटुंबाच्यो भलायकेच्यो समस्या, भुरग्यां खातीर भावनीक आदाराची गरज आनी सतत पयस राविल्ल्यान जावपी मानसीक ताण हाका लागून तांणी परतून गोंयांत वचपाचें थारायलें.
अपेक्षीत उत्पन्न मेळूंक नाशिल्ल्यान, बचत वा देशांत पयशे धाडूंक असमर्थ थारिल्ल्यान, जिणेचो दर्जो सुदारूंक नाशिल्ल्यानय ते परत आयले, अशें अभ्यासांत म्हणलां.
परत येतकच वेवसाय केलो
परतून येवपी स्थलांतरितां मदल्या 88.4% लोकांनी वेवसाय सुरू केला अशेंय ह्या अभ्यासांतल्यान स्पश्ट जालां. तातूंत कॅटरिंग सेवा (35.8%), रेस्टॉरंट वेवसाय (28.5%), भुसारी दुकानां (22.3%) आनी ब्युटी पार्लर/ ब्युटीशियन सेवा (1.8%) हांचो आस्पाव जाता. कांय जाण स्वताच्या यत्नांतल्यान गोंयचे अर्थवेवस्थेक योगदान दिवपाची इत्सा घेवन परतून आयल्यात.
सोदांचें धोरणात्मक म्हत्व
ह्या अभ्यासांत उजवाडाक आयिल्ले घटक – जशे की कामाचे वातावरण, वैयक्तीक आनी कुटुंबीक परिस्थिती, नोकरीची स्थिती, समाजीक आदार आनी भलायकी स्थिती – संवसारभरांतल्या स्थलांतरीत समाजांक लागू जातात अशें संशोधकांचें मत आसा.
ह्या प्रस्नांचेर लक्ष केंद्रीत करून योग्य धोरणां तयार केल्यार स्थलांतरितांचे जिणेचो दर्जो सुदारूं येता, तशेंच तांकां विदेशांत नोकरी करतना मेळिल्ल्या अणभवाचो वापर मायदेशांत करपाक मेळटलो, अशें अभ्यासांतल्यान दिसून येता.
सरकारान फुडाकार घेवचो
गोंय सरकारान परतून येवपी स्थलांतरितांनी परदेशांत मेळयिल्लें गिन्यान, कुशळटाय आनी अणभव राज्याचे उदरगती खातीर वापरपाक फावो तें वातावरण तयार करचें अशी शिफारस ह्या अभ्यासांत केल्या. तशेंच परतून येवपा खातीर तांच्या कारणांचेर, प्रेरणेचेर आदारीत पुनर्वसन धोरणां तयार करचीं, अशेंय अभ्यासांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
