भंडारी समाजांत धूसफूस चालूच

भांगरभूंय | प्रतिनिधी

-पत्रकार परिशदेंत एकामेकांचेर आराेप-प्रत्यारोपपणजीः फाटल्या कांय म्हयन्यां सावन गोमंतक भंडारी समाजांत जी अस्थिरताय चालू आसा ती बुधवारा परतून वयर आयल्या. समाजाच्या दोनूय पंगडांनी पत्रकार परिशद घेवन एकामेकांचेर आरोप केले. आपली समिती कायदेशीर आसा आनी उपेंद्र गांवकार समाजाची दिशाभूल करता असो आरोप देवानंद नायक हांणी केला. दुसरे वटेन अॅडहॉक समितीचे संजीव नायक हांणी सांगलें, सध्याचे परिस्थितींत कोणा कडेन नोंदणीचें नूतनीकरण प्रमाणपत्र ना. देवानंद नायक आनी अशोक नायक हेच दिशाभूल करीत आशिल्ल्याचो आरोप तांणी केलो.

हे संबंदीं गोमंतक भंडारी समाजाचे अध्यक्ष देवानंद नायक हांणी आमची समाजाची समिती कायदेशीर आसा अशें सांगलें. हे विशींचे सगळे कायदेशीर कागदपत्र आमचे कडेन आसात अशेंय तांणी स्पश्ट केलें.

बुधवारा पणजेंत जाल्ले पत्रकार परिशदेंत देवानंद नायक, अशोक नायक, संजय पर्वतकार, वासुदेव विर्डीकार, विजय कांदोळकार आनी हेर पदाधिकारी हाजीर आशिल्ले.

1913 वर्सा सोसायटीची नोंदणी जाले उपरांत सगळे अध्यक्ष कायदेशीर रितीन पदाचेर आयल्यात अशें देवानंद नायक हांणी सांगलें. नोव्हेंबर 2024 वर्सा नेमा प्रमाण सोसायटीची वेंचणूक जाली. हे खेपे 55 लोकां मदले 17 जाण वेंचून आयले. हाचे उपरांत जिल्लो निबंधकानय आमचे समितीक प्रमाणपत्र दिलां. हाका लागून फेब्रुवारी 2025 वर्सा हे समितीक कायदेशीर मान्यताय मेळ्ळी, अशें आसून लेगीत उपेंद्र गांवकार आमचेर फटीचे आरोप करतात.

उपेंद्र गांवकार हांणी स्वयंघोशीत समिती कायदेशीर आसा हें सिद्ध करचें वा ताणें आपली समिती स्वतंत्र अासा अशें सांगचें. कायद्या प्रमाण समिती घडोवपा खातीर कांय अटी आसात. तांचें पालन जावंक नाशिल्ल्यान ताची समिती कायदेशीर ना. पूण हें जाणून लेगीत ते आपले समिती वरवीं समाजाची दिशाभूल करतात. हें भंडारी समाजा खातीर धोक्याचे थारतलें. हे संबंदी दिवाणी न्यायालयांत सुनावणी चालू आसा अशें नायक हांणी सांगलें.

तांणी सांगलें, सध्या सोशल मिडियाचेर एक व्हिडियो व्हायरल जावपाक लागला. हातूंत आमचेर पयशांची अफरातफर केल्ल्याचो आरोप सुरू आसात. आमी नेमा प्रमाण ऑडीट केलां. आमचेर आरोप करचे पयलीं गांवकारा वांगडा आशिल्ल्या लोकांनी पयशांचे हिशोब दिवचे पडटले. जिल्लो निबंधकान मान्यताय दिल्या उपरांत हेर रजिस्ट्रारांक समिती बेकायदेशीर आसा असो निकाल दिवपाचो अधिकार ना. उच्च न्यायालयांत निर्णय जाय मेरेन रजिस्ट्राराक सुनावणी जावंक शकता तरी निमाणो निकाल दिवंक मेळना.

हाका जाप दितना तदर्थ समितीचे संजीव नायक हांणी सांगलें, सध्या देवानंद नायक वा उपेंद्र गांवकार हांच्या समितीच्या नूतनीकरणाचो रेकॉर्ड सरकारा कडेन ना. माहिती हक्क कायद्या खाला आमकां मेळिल्ले म्हायती प्रमाण, फकत 25 जून 2025 मेरेन सोसायटीचें नुतनीकरण जालें, ताचे उपरांत सोसायटी कायद्याच्या नियम 35, ब, 5 प्रमाण 25 जून उपरांत सोसायटीची नोंदणी जावंक नाशिल्ली, हाचे भायर आमी सोसायटीन केल्ल्या वेंचणुके विशींय म्हायती मागयिल्ली.

जिल्लो निबंधकान आमकां दिल्ले म्हायती प्रमाण, 2021-2024 आनी 2024-2029 वर्सा वेंचणूक जावंक ना. 2024-2029 वर्साचे वेंचणुके खातीर दिल्लें अनुसुची 1 नेमा प्रमाण ना अशें स्पश्ट केलां. देवानंद नायक समितीन जाणीवपूर्वक समाजाच्या कायद्यांत बदल केल्ले. पूण मेळिल्ले म्हायती प्रमाण, जिल्लो निबंधक कार्यालयानय तांकां मान्यताय दिवंक ना. आमचो कायदेशीर पंगड हो लढो तर्कीक निश्कर्शांत व्हरतलो असो आमकां विस्वास आसा.

सध्या देवानंद नायक हांणी जानेवारी 2025 वर्सा अनुसुची 1 दस्तावेज आनी 17 वांगड्याच्या समितीचो अर्ज जिल्लो निबंधक कार्यालयांत सादर केल्लो. तातूंतल्या चार जाणांनी ताचेर सय लेगीत करूंक नाशिल्ली. वेंचणुकेंत हाजीर आशिल्ल्या दोन अधिकाऱ्यांनी ताचेर सय करूंक ना. हाका लागून निबंधक कार्यालयान ताका मान्यताय दिवंक ना. आठ दिसांनी परत थंय वचून देवानंद नायक हांणी स्वताच्या अर्जाची प्रमाणीत प्रत मागली. ताचेर जिल्लो निबंधकांची म्होर आसली तरी तो फकत (इनवर्ड) दस्तावेज आसा.

सध्या तोच दस्तावेज दाखयता. पूण हाचो अर्थ ताची समिती कायदेशीर आसा असो न्हय. तशेंच आमचे कडेन अशे जायते इनवर्ड केल्ले दस्तावेज आसात.

गोंयच्या सुमार 5 लाख लोकांचो समाजा कडेन संबंद आयला. पूण कायद्या प्रमाण सोसायटीची नोंदणी जायना. कोटी रुपयांची संपत्ती आनी बँक खातीं ही सोसायटीची आसा. अशे स्थितींत नोंदणी ना जाल्यार हे मालमत्तेचो गैरवापर करूं येता. हे खातीर हो प्रस्न सुटावो जाय मेरेन सोसायटीचो तात्पुरतो ताबो सरकारी प्रशासकाक ​​दिवचो अशी मागणी आमी सरकारा कडल्यान केल्या. समाजाची मालमत्ता राखपा खातीर हें गरजेचें आसा अशें संजीव नायक हांणी सांगलें.