भांगरभूंय | प्रतिनिधी
ल्हान भुरगीं हीं मातयेच्या गुळ्या भशेन आसतात. जसो तांकां आकार दिता तशी तीं घडटात. भुरग्यांक घडोवंक ताच्या आवय, बापायचो तसोच शिक्षकांचो मोलादीक वाटो आसता. वाचनांत, बरोवपांत जाव दुसर्यांनी वाचिल्लें आयकपांत भुरगीं सदांच कितें ना कितें शिकत आसतात. भुरग्यांत वाचनसंस्कृती निर्माण करचे खातीर तांकां वाचनाची संवय ल्हानपणा पासून लावप खूब गरजेचें.
पुस्तक हे भुरग्यांचें पयलें खेळणें जावंक जाय. भुरगें णव म्हयन्याचें जाता पासून तांच्या हातांत जाड पानांचें, फकत उतरां आनी चित्रां आशिल्लें पुस्तक दिवंक जाय. हें पुस्तकरुपी खेळणे भुरगें तीन वर्सां जाय मेरेन तांच्या हातांत दिवचें. हो एक खेळ समजून तांकां तो खेळूक दिवचो. ते एक बालसाहित्यांतलें शिशूसाहित्य जावन आसा. ल्हान भुरग्यांत वाचनाची आवड निर्माण करची आसल्यार तांकां चित्रां आशिल्ली ल्हान ल्हान काणयाची पुस्तकां वाचूक दिवची वा वाचून दाखवची. काणयांतल्यान चित्रांची वळख तांकां करून दिवची. ल्हान भुरग्यांच्या फुड्यांत स्वताच पालकांनी काणयांचीं पुस्तकां वाचचीं, रातच्या वेळार भुरगीं न्हिदचे पयलीं तांकां तांचे आवडीच्यो काणयो सांगच्यो. त्या मजेदार काणयां वरवीं भुरग्यांत वाचनाची आवड निर्माण जावंक शकता.
घरांत खुब्बशी पुस्तकां आसप गरजेचें आनी तीं भुरग्यांक रोखडींच मेळटात तशीं दवरचीं. भुरग्यांच्या वाडदिसा निमतान तांकां ताचें आवडीचीं पुस्तकां भेट दिवचीं. भुरग्यां खातीर एक ल्हानशें घरातूच वाचनघर आसल्यार बरें, जेणेकरून भुरग्याक पुस्तकां विकत घेवपाची आवड लागतली. भुरग्यांनी खंयचे तरेचीं पुस्तकां वाचचीं हें तांच्या घरच्यांनी आनी शिक्षकांनी तांकां सुचोवचें आनी आपलें भुरगें कितें वाचता ताचे कडेनूय तुमचे लक्ष आसूंक जाय…!
भुरग्यांच्या भुरगेपणात तांकां मोबायल वा विडिवो गेमी हांचे पासून पयस दवरचें. शारांत खंयसरूय जर पुस्तक प्रदर्शन लागलां आसत तर आपल्या भुरग्याक घेवन त्या प्रदर्शनाक वचचे आनी भुरग्या खातीर कांय नवीन पुस्तकां विकत घेवचीं. बरें भाशण करतलो जाल्यार खूब वाचन करप गरजेचें, बरी म्हायती मेळयतलो जाल्यार सदांच दिसाळें वाचप गरजेचें. दिसाळ्यांत आमकां खूबशे ज्ञान मेळटा. खेळा विशीं, राजकारणा विशीं, देश- विदेशा विशी खूब म्हायती मेळटा.
पुस्तकाची काळजी कशी घेवप, तें चड काळ कशें तिगोवन दवरप, आपलें पुस्तक दुसर्यांक वाचूंक दिवप, दुसर्याचींय पुस्तकां वाचूंक घेवप आनी रोखडींच परत दिवप हें सगळें भुरग्यांक शिकोवचें. वाचन मनशाक संतुश्ट करता, वाचन चिंतनाक चाल दिता, वाचन संस्काराचे बीं रोयता, वाचन समाजाक नितीचें बळ दिता. देखून खूब- खूब वाचूया, बरें- बरें बरोवया. साहित्याचे धन वाडोवया….!
अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
