भांगरभूंय | प्रतिनिधी
राज्यपाल राजेंद्र आर्लेंकार : गोंय विद्यापिठाचो स्थापना दीस उमेदीन
भांगरभूंय । प्रतिनिधी
पणजी : विद्यापिठांनी स्वता पुरतें मर्यादीत रावनासतना लोकां मदीं वच्चें. समाज, देशाक कितें जाय हाचो विचार करून अभ्यासक्रम तयार करचे. सर्वसामान्य व्यक्तीं मदीं विद्यापीठ हें आपले खातीर आसा, अशी भावना निर्माण जावंक जाय, अशें केरळचे राज्यपाल राजेंद्र आर्लेंकार हांणी सांगलें. सोमारा 30 जूनाक गोंय विद्यापिठाच्या 41 व्या स्थापना दिसाचे कार्यावळींत ते उलयताले. ह्या वेळार कुलगुरू हरीलाल मेनन, रजिस्ट्रार सुंदर धुरी हाजीर आशिल्ले.
आर्लेकार हांणी सांगलें, विद्यापिठानी लोकांची गरज कितें आसा, हें समजून काम करप अपेक्षीत आसा. विद्यापीठ वा हेर खंयचेय संस्थेन सिंहावलोकन करप गरजचें आसता. आपूण भुतकाळांत खंय आशिल्लो, वर्तमानांत खंय आसा आनी फुडारांत खंय पावपाचें आसा, हाचो विचार करपाक जाय. विद्यापिठांनी वैश्वीक विचार समजून ते प्रमाण काम करप गरजेचें आसा, ना जाल्यार विद्यापिठां फक्त अभ्यासक्रम शिकोवपी शिक्षणीक संस्था जातल्यो. अशें जालें जाल्यार विद्यापीठ आनी म्हाविद्यालय हांचे मदीं फरक उरचो ना.
प्राचीन भारतीय ज्ञान वेवस्था थारावीक लोकां पुरती मर्यादीत आशिल्ली हो चुकीचो समज आसा. 1889 त मद्रास आनी हेर प्रेसिडेन्सींत जाल्ल्या सर्व्हेक्षणा प्रमाण तेन्ना भारतांतलें साक्षरतेचें प्रमाण चड आशिल्लें. ब्रिटिशांनी मकॉले हाच्या फुडारपणा खाला नवी ज्ञान पद्दत हाडली. हे उपरांत प्राचीन ज्ञान पद्दतींतल्यो बऱ्यो गजाली कुशीक दवरल्यात. हाका लागून हांगाच्या लोकांक आपलें दायज, संस्कृती हांचो लेगीत विसर पडला. दुर्दैवान स्वातंत्र्या उपरांत लेगीत तेन्नाच्या नेतृत्वान पाश्चिमात्य गजालींचेर भर दिलो. हजारांनी वर्सां आदीं भारतांत नालंदा तक्षशिला सारकीं विश्व विद्यापिठां आशिल्लीं. नालंदा विद्यापिठांत एका वेळार 10 हजारां परस अदीक विद्यार्थी शिकताले. जाल्यार तांकां शिकोवपा खातीर अडेज हजार शिक्षक आशिल्ले. तातूंत कांय बायलो लेगीत आशिल्ल्यो. ब्रिटिशांनी आपली ज्ञान पद्दती विसरायेर घातली. आतां आमी पोरण्या आनी नव्या शिक्षणांतल्या बऱ्या गजालींचो मेळ घालून नव्या शिक्षणांत पद्दती तयार करपाक जाय. हातूंत पोरणें दायज आनी नवें तंत्रज्ञान हांचो आस्पाव आसपाक जाय. राष्ट्रीय शिक्षण धोरण हें अशें करपाचो पयलो यत्न आसतलो, अशें आर्लेंकार हांणी सांगलें.
आई बाबा बदला मम्मी पप्पा
ब्रिटीश शिक्षण पद्दतीक लागून आमचे मदीं लेगीत खूब बदल जाल्यात. आदीं घरांत आई, बाबा, काका, मामा अशीं उतरां वापरताले. आतां ह्या उतरांचे सुवातेर म्मी, पप्पा, अंकल, आंटी अशीं उतरां आयल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
