भांगरभूंय | प्रतिनिधी
भांगरभूंय खबरां संस्थाः 2047 मेरेन विकसीत भारत जावप हेच आमचें ध्येय. विकसीत भारत जावपा खातीर दर मनशाचें उत्पन्न आठ पटींनी वाडोवप गरजेचें, आनी हाचे खातीर आमच्या शिमेचेरूय शांतताय आसप गरजेचें. झुजारी परिस्थिती आयल्यार अर्थीक उदरगत जावंक शकना. प्रगती आनी उदरगती खातीर शांतताय ही मुळावी गरज अशें उपराष्ट्रपती जगदीप धनखड हांणी सांगलें.
मुरगांवां सुमार 300 कोटी रुपयांच्या अर्थीक खर्चाचे तीन प्रकल्पांचे लोकार्पण कार्यावळींत ते उलयताले.
ह्या वेळार मुख्यमंत्री डॉ. प्रमोद सावंत, राज्यपाल पी. एस. श्रीधरन पिल्लई, बंदरां, बोट येरादारी आनी उदकामार्ग राज्यमंत्री शांतनू ठाकुर, सचीव टी. के. रामचंद्रन आनी हेर अधिकारी हजर आशिल्ले.
ह्या वेळार जगदीप धनखड हांणी ऑपरेशन सिंदूराचीय तोखणाय केली. आतंकवाद सोंपोवप हेच आमचें उद्दश्ठ आसा, होच संदेश हातूंतल्यान प्रधानमंत्री मोदी हांणी संवसाराक दिला, अशें तांणी सांगलें.
भारतीय तटरक्षक दळाच्या समर्पणाची आनी सेवेची तोखणाय करताना उपराष्ट्रपतींनी म्हणलें,
आयज म्हजे खातीर एक खाशेलो प्रसंग, कोस्टल गार्डाच्या समर्पणाक, कामगिरीचो आनी बांदिलकीचो आपूण भोवमान करता. तांच्या धैर्याक आनी निश्चेवाक सलाम करता, अशें तांणी सांगलें.
भारतान आंतरराष्ट्रीय शिमे भायर खूब पयसुलल्यान दुस्मानाच्या वाठारांत हल्लो केलो आनी हे कारवायेंतय आमी फकत आतंकवाद्यांक लक्ष्य करपाचें धोरण पाळ्ळें अशें तांणी सांगलें.
लोकशाय वेवस्थेच्या इतिहासांतली ही तोखणायेची कामगिरी आसा.
तांणी मुखार म्हणलें, सुरक्षेंत , अर्थवेवस्थेंत, उदरगतींत बळगें आनी राश्ट्रवादाक खोल, अखंड, बिनशर्त वचनबद्धताय म्हत्वाची अशें तांणी सांगलें. राष्ट्रवादाची अखंड वचनबद्धताय आनी राश्ट्रीय सुरक्षा खातीर सतत तयारी जाय, अशी कल्पना आमी जायत्या सुवातींनी मांडल्या आनी गोंयांतूय परतून मांडटात अशें तांणी सांगलें. आयज भारत, संवसारीक अर्थीक शक्त आनी दर्यावेली शक्त म्हणून उदेल्लो, शांतताय आनी उदरगती खातीर बांदील आसा, अशेंय तांणी म्हणलें. भारत संवसारांतली चवथी व्हडली अर्थवेवस्था जाल्या.
केंद्र सरकार आनी प्रधानमंत्री नरेंद्र मोदी हांची तोखणाय करतना धनखड हांणी म्हणलें, सुमार 300 कोटी रुपया मोलाचे तीन प्रकल्प समर्पीत करपाची म्हाका एक सुखद संद मेळ्ळी. प्रधानमंत्री उदरगती विशीं उत्सुक आसा; उदरगत हें ताचें मिशन आनी ताचो विस्वास आसा. ताची अंमलबजावणी करून भारताची उदरगत करप हेंच तांचे ध्येय आसा, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
