भांगरभूंय | प्रतिनिधी
पणजीः मंगळारा सावन राज्यांत सुरू जाल्ल्या उटंगाराच्या पावसाक लागून पर्यटकांक दुदसागर घसघश्याक भेट दिवपाचेर बंदी घाल्या. ताका लागून थळावे आनी पर्यटकांनी अश्या धोक्याचे सुवातेर वचप टाळचे अशें आवाहन रानां मंत्री विश्वजीत राणे हांणी केलां.
राज्य हवामान विभागान दोन दिसा पयलीं राज्यात उटंगाराच्या पावसाची शक्यताय उक्तायिल्ली. ते प्रमाण मंगळार आनी बुधवार अशें दोन दीस ऑरेंज अलर्ट जाली केल्लो. मंगळारा राज्यांत उटंगाराचो पावस पडला. बुधवाराय धोग्यांनी पावस पडला. ते खातीर हवामान खात्यान ऑरेंज अलर्ट फाटीं घेवन रॅड अलर्ट जारी केल्लाे. ते प्रमाण बुधवारा राज्यभर पावसान हजेरी लायली. हे फाटभुंयेर दूदसागर तशेंच हेर वाठारांतल्या घसघश्यांचेर अनुचीत प्रकार घडचो न्हय, हे खातीर रानां खात्यान पुराय जतनाय घेतल्या. नागरीक आनी पर्यटकांक दुदसागर घसघश्याचेर वचपाक बंदी घातल्या. तशेंच धोक्याचे सुवातेर वचपाचे टाळचें अशें आवाहन मंत्री राणे हांणी केलां.
मजगतीं, फाटल्या कांय वर्सांत पावसाळ्यांत घसघश्याक भेट दिवपाक गेल्ल्या कांय पर्यटकांक मरण येवपाच्यो घडणुको घडिल्ल्यो. ताका लागून रानां खात्यान आता पसूनच हे विशीं सादूरताय बाळगिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
