पंचायत वेंचणूक: अर्ज भरपाचो आयज निमाणो दीस

भांगरभूंय | प्रतिनिधी

पणजी : ग्रामपंचायत वेंचणुके खातीर उमेदवारी अर्ज भरपाचो आयचो निमाणो दीस आसा. निमाण्या दिसा सगल्यांत चड अर्ज सादर जातले अशी आस्त आसा. आतां मेरेन पंंचायत वेंचणुकेंत 4724 अर्ज दाखल जाल्यात.

राज्यांतल्या 186 पंंचायतींं खातीर 10 ऑगस्टाक मतदान जातलें. 12 ऑगस्टाक मतमेजणी जातली. अर्ज सादर करपाचो आयज निमाणो दीस आसा. मंगळारा 26 तारखेक अर्जांची छाननी जातली. बुधवारा 27 जुलयाक अर्ज फाटीं घेवपाची तारीख आसा. हाका लागून 27 जुलयाक उमेदवारांचे चित्र स्पश्ट जातलें.

आयतारा सुटयेक लागून अर्ज घेवपाची प्रक्रिया बंद आशिल्ली. शेनवारा मेरेन 4724 उमेदवारी अर्ज दाखल जाल्ले. आतां मेरेन बार्देस म्हालांत सगल्यांत चड 989 अर्ज दाखल जाल्यात. पयल्या दिसा 18 तारखेक 10 उमेदवारी अर्ज दाखल जाल्ले. हाचे उपरांत 19 तारखेक 70, 20 तारखेक 203 अर्ज दाखल जाले. 21 जुलयाक 1209, 22 जुलयाक 1962 जाल्यार शेनवारा 23 तारखेक 1270 अर्ज दाखल जाले. आतां मेरेन 22 जुलयाक सगल्यांत चड अर्ज दाखल जाल्यात. अर्ज भरपाच्या निमाण्या दिसा सगल्यांत चड अर्ज दाखल जावपाची शक्यताय आसा.