भारतान आडायलो चिनाब न्हंयेचो प्रवाह

भांगरभूंय | प्रतिनिधी

पाकिस्तानाच्या ३ कोटी लोकांचे आतां जातले हालहाल

पहलगाम, खबरां संस्था: पहलगाम आतंकवादी हल्ल्या उपरांत भारतान पाकिस्ताना आड केल्ल्या ‘वॉटर स्ट्रायका’चो परिणाम दिसता.
भारतान बगलीहार धरणांतल्यान चिनाब न्हंयेचें उदक आडायलां. उपरांत, सोमारा पाकिस्तानांतल्या सियालकोटांत चिनाब न्हंयेच्या उदकाची पातळी १५ फूटां मेरेन देंवली. ही पातळी आयतारा परस ७ फूट उणी आसा.
चिनाब न्हंयेचें पात्र सेगीत देंविल्ल्यान, पंजाबांतल्या (पाकिस्तान) २४ म्हत्वाच्या शारांतल्या ३ कोटीं परस चड लोकांक ४ दिसांनी पिवपाच्या उदका खातीर रावचें पडूं येता. पाकिस्तानांतल्या फैसलाबाद आनी हाफिजाबाद सारकिल्ली दाट लोकवस्ती आशिल्ल्या शारांनी ८०% लोकसंख्या पिवपाच्या उदका खातीर चिनाब न्हंयेच्या उदकाचेर अवलंबून आसा. पाकिस्तानच्या सिंधू जल प्राधिकरणाक भारताच्या ह्या निर्णयाक लागून खरीप पिकां खातीर २१% उदक उणें जातलें, असो भंय आसा. पाकिस्तानी संसदेन हाका झूंज आपोवपाचें कृत्य म्हणलां.

सिंधू उदकाचो करार आडायलो
पहलगाम दहशतवादी हल्ल्या उपरांत भारतान सिंधू उदक करार स्थगीत केला. १९ सप्टेंबर १९६० दिसा भारत आणि पाकिस्तानांत ६ न्हंयांचें उदक वाटावपाक सिंधू उदका करार जालो. ह्या करारा प्रमाण, भारताक तीन पूर्वे कडच्या न्हंयांचेर (रावी, बियास आनी सतलज) अधिकार मेळ्ळे, जाल्यार पाकिस्तानाक तीन पश्चिमे कडल्यो न्हंयो (सिंधू, झेलम आनी चिनाब) वापरपाची परवानगी दिली.
पाकिस्तानाची ८०% शेती सिंधू, झेलम आनी चिनाब न्हंयांच्या उदकाचेर अवलंबून आसा. आतां भारतान ह्या न्हंयांचें उदक आडायिल्ल्यान पाकिस्तानांचें उदकाचें संकश्ट चडूच वाडलें. थंयची अर्थीक परिस्थिती इबाडटली. तशेंच, पाकिस्तान जायतीं धरणां आनी उदकांतल्या लायट प्रकल्पांतल्यान वीज तयार करता. उदकाच्या उणावाक लागून वीज निर्मितींत घट जावपाक शकता, जाका लागून अर्थीक आनी उद्देगीक क्रियाकलापांचेर परिणाम जातले.

पहलगाम : आतांपर्यंत १८० दुबावितांक ताब्यांत
पहलगाम आतंकवादी हल्ल्यांतल्या गुन्यांवकारांचो सोद सुरक्षा यंत्रणांनी खर केला. आतां मेरेन २८०० परस चड लोकांची चौकशी केल्या आनी १८० दुबावितांक ताब्यांत घेतल्यात. आतंकवादी नेटवर्क आनी आतंकवाद्यांक आसरो दिवप्यांक सोंपोवपाची कारवाय सुरक्षा रक्षकांनी सुरू केल्या.