भांगरभूंय | प्रतिनिधी
जम्मू-काश्मीर : पहलगामांत जाल्ल्या आतंकवादी हल्ल्यांत आतां मेरेन 20 जाणांक मरण आयिल्ल्याची भिरांत आसा. हातूंतले चडशे लोक पर्यटक आशिल्ले. पर्यटकांक तांचीं नांवां आनी धर्म विचारतकच आतंकवाद्यांनी तांचो गैरवापर करून बेपर्वा करून गोळीबार केलो. आतां मेरेन 20 जाणांक मरण आयिल्ल्याची म्हायती सूत्रांनी दिल्या. देखून हो आंकडो आनीक वाडटलो असो भंय आसा. हे घडणुकेक लागून पहलगामांत आतंकवादाचें वातावरण पातळ्ळां. हे घडणुकेंत जायते पर्यटकूय जखमी जाल्यात अशी म्हायती मेळ्ळ्या.
दुसरे वटेन केंद्रीय गृहमंत्री अमित शाह जम्मू-काश्मीराक वचपाक भायर सरल्यत. फाल्यां ते घडणुकेच्या सुवातेर भेट दिवपाची शक्यताय आसा.
जम्मू-काश्मीरांतल्या पहलगामांत व्हड आतंकवादी हल्लो जाला. धपको दिवपी गजाल म्हळ्यार हो हल्लो भारतीय सैनिकांचेर न्हय, जाल्यार पर्यटकांचेर जालो. ह्या हल्ल्यांत 20 जाणांक मरण आयलां, जाल्यार हेर जायते जाण गंभीर जखमी जाल्यात असो भिरांत आसा. हे घडणुके उपरांत दिल्लींतल्या केंद्रीय गृहमंत्री अमित शाह हांच्या निवासस्थानी उच्च पांवड्या वेली बसका जाली. हाचे उपरांत शाह जम्मू-काश्मीराक वचपाक भायर सरला.
मंगळारा जाल्ल्या आतंकवादी हल्ल्यांत पर्यटकांच्या पंगडाक निशाणें केल्लें. ह्या हल्ल्या वेळार कांय घोड्यांकूय गोळी लागल्यो. सध्या सुरक्षा दळान पुराय वाठाराक घेराव घालून सोद कारवाय चड खर केल्यात. आतंकवाद्यांचो सोद चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
