भांगरभूंय | प्रतिनिधी
2,655 खटले पांच वर्सां सावन रखडले; सरकारा कडल्यान सुनावण्यांक गती
पणजी: कूळ, मुंडकार तशेंच म्युटेशना विशींचे सुमार 1,455 खटले धा वा ताचे परस चड काळा सावन, जाल्यार 2,655 खटले पांच वा ताचे परस चड काळा सावन मामलेदारांच्या न्यायालयांत प्रलंबीत आशिल्ल्याचें महसूल खात्यान जारी केल्ल्या एका अहवालांतल्यान उक्तें जालां.
महसूल खात्या कडेन संबंदीत कूळ, मुंडकार, म्युटेशन बी खटल्यांचेर रोखड्या रोखड्यो सुनावण्यो घेवन ते निकालांत काडपाचे यत्न सरकारा कडल्यान सुरू आसात. पूण, विवीध कारणांक लागून मामलेदारांच्या न्यायालयांत अशा खटल्यांच्या सुनावण्यांक कळाव जायत आसा. ताका लागून अशे खटले खूबशा वर्सां सावन प्रलंबीत उरल्यात. तातूंत धा वा ताचे परस चड काळा सावन प्रलंबीत आशिल्ल्या सुमार 1,455, जाल्यार पांच वा ताचे परस चड काळा सावन प्रलंबीत आशिल्ल्या 2,655 खटल्यांचो आस्पाव आशिल्ल्याचें महसूल खात्यान अहवाांतल्यान सादर केल्ले आंकडेवारींतल्यान मुखार आयलां.
गोंयांत जमनी संदर्भांतले म्हत्वपूर्ण आशिल्ल्या कूळ, मुंडकार तशेंच म्युटेशना विशींच्या खटल्यांचें प्रमाण मामलेदारांच्या न्यायालयांनी फाटल्या खूबशा वर्सां सावन वाड जायत आसात. पूण, मामलेदारांक अशा खटल्यांचेर सुनावण्यो घेवन उपाय काडपा सयत हेर खूबश्यो म्हत्वाच्यो जापसालदारक्यो लेगीत आसतात. ताका लागून मामलेदार निर्धारीत वेळांत सुनावणी घेवन अशी प्रकरणां निकालांत काडूंक शकनात. ताका लागूनच तांच्या न्यायालयांत धा वर्सां सावन सुमार 1,455 प्रकरणां प्रलंबीत आशिल्ल्याचें आंकडेवारींतल्यान दिसून येता.
मजगतीं, महसूल खात्या कडेन खूबशा वर्सां सावन आशिल्लीं प्रलंबीत प्रकरणां रोखड्या रोखडी निकालांत काडपा खातीर दर शेनवाराय मामलेदार कचेऱ्यो उक्त्यो दवरून सुनावण्यो घेवपाचो निर्णय सरकारान घेतला. तेच फाटभुंयेर कांय म्हयन्यां पयलीं दक्षीण गोंयांत मामलेदारांनी एक दीस विशेश सुनावण्यो घेवन, प्रलंबीत प्रकरणां निकालांत काडपाचे यत्न केले. फुडल्या काळांतूय अशेच पद्दतीन सुनावण्यो घेवन प्रलंबीत प्रकरणां जाता तितले बेगीन निकालांत काडपाचे यत्न सरकारा कडल्यान जातले अशी म्हायती गोपांनी ‘भांगरभूंय’ कडेन उलयतना दिली.
खंयच्या म्हालांत कितले खटले प्रलंबीत
म्हाल पांच वर्सां परस चड धा वर्सां परस चड
पेडणें 269 17
दिवचल 61 22
तिसवाडी 150 116
बार्देस 203 138
सत्तरी 0 12
दक्षीण गोंय 208 1
जिल्होधिकारी
साश्टी 682 207
फोंडें 534 208
मुरगांव 64 19
केपें 102 24
सांगें 168 105
काणकोण 146 208
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
