भांगरभूंय | प्रतिनिधी
‘ड्रंक अॅण्ड ड्रायव्ह’ चालकां आड बेगिनूच कायदो दुरुस्ती
भांगरभूंय I प्रतिनिधी
पणजी : आतां मेरेन गोंयांत रातच्या वेळार घडिल्लें 95 टक्के अपघात सोरो पियेवन वाहन चलयिल्ल्यान (ड्रंक अॅण्ड ड्रायव्ह) घडल्यात. सोरो पियेवन वाहनां चलोवप बंद जावपाक जाय, हे खातीर फुडल्या कांय म्हयन्यांत कायद्यांत दुरुस्ती जातली, अशें मुख्यमंत्री डॉ. प्रमोद सावंत हांणी शुक्रारा पत्रकारां कडेन उलयतना सांगलें.
बुधवारा मध्यान रातीं जुवारी पुलाचेर जाल्ल्यार अपघातांत लोटलेंतल्या चवगांक मरण आयलें. मोटार वेगान आशिल्ल्यान पुलाचो कठडो मोडून ती जुवारी न्हंयेंत पडली. हातूंत मोटारींतल्या चवगांकूय मरण आयलें. हे घडणुकेन राज्यांत रातच्या वेळार घडपी अपघातांचो मुद्दो परतून वयर आयला.
हे फाटभुंयेर उलयतना मुख्यमंत्र्यान म्हणलें, फाटल्या कांय वर्सांत गोंयांत रातच्या वेळार जे अपघात घडल्यात तातूंतले 95 टक्के अपघात सोरो पियेवन वाहन चलयिल्ल्यान घडल्यात. सोऱ्याचे घुंवळेंत वाहन चलयिल्ल्यान वाहनाच्या वेगाचो अदमास येना आनी वाहना वयलो ताबो सुटून जायते अपघात घडल्यात. हातूंत जायत्या जाणांक आपलो जीव वगडावचो पडला. अशा घडणुकांक अाडावपाक सरकारी पांवड्या वयल्यान खर पावलां उबारतले, अशें मुख्यमंत्र्यान सांंगलें.
सोरो पियेवन वाहनां चलोवप बंद जावचे हे खातीर येरादारी पुलीस तालांव दिताले. पूण तालांव मेळून लेगीत अशें प्रकार परतून घडपाक लागल्यात. ते खातीर सरकारान कायद्यांत दुरुस्ती करून ठोस उपाय येवजण आंखपाचो विचार सुरू केला. फुडल्या कांय म्हयन्यांत कायदो दुरुस्तीचें काम हातांत घेतले, अशेंय मुख्यमंत्र्यान सांगलें.
सुदारीत मोटार वाहन कायदो योग्य, पूण रातची गस्त गरजेची
गोंयांत सुदारीत मोटार वाहन कायदो लागू केला, पूण ताची अंमलबजावणी योग्य पद्दतीन जायना.
सुदारीत कायद्या प्रमाण, अती वेगान वाहन चलयल्यार पांच हजार रुपया वा ताचे परस चड दंडात्मक कारवाय वा तीन म्हयन्यांची बंदखणीची ख्यास्त अशी तजवीज आसा.
सोरो पियेवन वाहन चलयल्यार 10 हजार रुपया वा ताचे परस चड दंड वा 6 म्हयन्यांची बंदखण अशी तजवीज आसा. मात होच गुन्यांव परतून केल्यार 15 हजार रुपया वा ताचे परस चड दंडात्मक कारवाय वा दोन वर्सांची बंदखणीची ख्यास्त वा दोनूय ख्यास्त जावये अशी तजवीज आसा.
सोरो पियेवन वाहन चलोवप बंद करपाक ह्या कायद्याची अंमलबजावणी जावपाक शकता. पूण अशा चालकांचेर नियंत्रण दवरपाक पुलिसांक रातच्या वेळार गस्तींत वाड करची पडटली, अशी प्रतिक्रिया रस्ते सुरक्षे विशीं काम करपी तज्ञांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
