भांगरभूंय | प्रतिनिधी
पणजी : ‘पीएम सुर्य घर मुफ्त बिजली योजने’चो गोंयच्या 900 परस चड घरांनी लाव घेतला. केंद्रान 5 कोटी रुपयांचें अनुदान येवजणेच्या लाभार्थ्यांक दिलां, अशी म्हायती केंद्रीय नवीकरणीय उर्जा मंत्रालयान दिल्या.
आपल्या घरा वयर सोलर पॅनल बसोवन सौर्य उर्जे वरवीं वीज तयार करपा खातीर सोलर यंत्रणा बसोवपाक ‘पीएम सुर्य घर मुफ्त बिजली’ येवजणे खाला अनुदान दिता.
जीं घरां 2 किलो वॉट्ट इतली सोलर यंत्रणा बसयतात तांकां दर किलो वॉट्ट फाटल्यान 30 हजार रुपयांचें अनुदान मेळटा आनी हाकाच जोडून अतिरिक्त 3 किलो वॉट्ट तांकीची यंत्रणा बसयत जाल्यार दर किलो वॉट्ट फाटल्यान 18 हजार रुपयांचें अतिरिक्त अनुदान मेळटा. जर 3 किलो वॉट्ट परस चड तांकीची सोलर यंत्रणा बसयल्यार दर वॉट्ट फाटल्यान 78 हजार रुपयांचें अनुदान मेळटा.
हे येवजणे खातीर गोंयांतल्यान 5103 अर्ज आयल्यात आनी तातूंतले 929 अर्ज मंजूर जाल्यात तांकां अनुदान मेळ्ळां. तातूंतल्या 816 जाणांनी आपल्या घराचेर सोलर यंत्रणा बसयल्या. हे सोलर यंत्रणेंतल्यान 7.07 किलो वॉट्ट इतली वीज तयार जाता. केंद्र सरकारान हे येवजणे खातीर 5.43 कोटी रुपयांचें अनुदान दिलां. जे सोलर विक्रेते पीएम सुर्य घर पोर्टलाचेर नोंद जाल्यात तांच्या आस्थापनांनी वचून सोलर यंत्रणा घेवचीं. सरकार जे अनुदानाचे पयशे आसात ते विक्रेत्यांक दितले आनी सवाय भितर अनुदानाचेर यंत्रणा ही गिरायकांक मेळटली. एकदां अनुदान मंजूर जाले उपरांत विक्रेते घरा येवन सोलर यंत्रणा बसयतले. ही सोलर यंत्रणा घेवपा खातीर रिणाचो पर्याय लेगीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
