भांगरभूंय | प्रतिनिधी
नवी दिल्ली, खबरां संस्था ः ह्या म्हयन्या सावन 900 वयर गरजेचीं वखदां 1.74 टक्क्यांनी म्हारग जाल्यात. देखून वखदांवेलो खर्च वाडटलो. हातूंत संसर्ग (इन्फेक्शन), गोडेंमूत, काळजाच्या दुयेंसांचेर संबंदीत वखदांचो आस्पाव जाता. केंद्र सरकाराच्या रसायनां आनी सारें मंत्रालयाच्या कार्यक्षेत्रांत येवपी राष्ट्रीय फार्मास्युटिकल प्रायसिंग अथॉरिटी (एनपीपीए) गरजेच्या वखदांचो दर थारायता. फाटल्या वर्साचो ठोक दर निर्देशांक (डब्ल्यूपीआय) लक्षांत घेवन वखदांचो दर वाडयतात.
हे संबंदी एनपीपीएन निवेदन जारी केलां. हातूंत तांणी सांगलें, 2023 वर्साच्या तुळेंत 2024 वर्सा डब्ल्यूपीआयंत 1.74028 टक्के बदल जाला.
मलेरिया, अॅन्टीव्हायरल वखदां आनी अॅन्टीबायोटिकचे दर वाडटले…
मलेरिया, अँटीव्हायरल वखदां, आनी अॅन्टीबायोटिक वखदांचो दर वाडपाचो आसा. केंद्र सरकाराच्या आदेशा उपरांत अॅन्टीबायोटिक वखदां अजिथ्रोमायसिनचे दर गुळयेक 11.87 रुपया (250 मिलीग्राम) आनी 23.98 रुपया (500 मिलीग्राम) आसतले. अमोक्सिसिलिन आनी क्लेव्हुलेनिक अॅसिडाच्या फॉर्म्युलेशना सयत अॅन्टीबॅक्टेरियल ड्राय सिरपचे दर 2.09 रुपया दर मिलिलीटराक आसतलें.
एसायक्लोव्हिर सारक्या अँटीव्हायरल वखदांचो दर 7.74 रुपया (200 मिग्रॅ) आनी 13.90 रुपया (400 मिग्रॅ) दर गुळी इतलो आसतलो. जाल्यार मलेरियाचेर उपचार करपाक वापरिल्ल्या हायड्रॉक्सीक्लोरोक्वीनचें मोल दर गुळयेक 6.47 रुपया (200 मिलीग्राम) आनी 14.04 रुपया (400 मिलीग्राम) आसतलें.
पेन किलर्स वखदांय म्हारग
दुखणी उणी करपा खातीर घेतिल्ल्या डायक्लोफेनाकाचे दर आतां दर गुळयेक 2.09 रुपया जातले. जाल्यार इबुप्रोफेन खातीर दर गुळयेक 0.72 रुपया (200 मिग्रॅ) आनी 1.22 रुपया (400 मिग्रॅ) आसतलें. एनपीपीएन गरजेच्या वखदां वळेरेंतल्या 1 हजारां वयर वखदां खातीर दर वाडोवपाक मान्यताय दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
