भांगरभूंय | प्रतिनिधी
आयज ग्रामस्थ मांद्रें पंचायतीच्या सचिवाची घेतले भेट
पेडणें: मांद्रें ग्रामसभेंत मांद्रें पंचायत वाठारांत कसलेच तरेच्या व्हिला मेघा प्रकल्पांक परवानगी दिवची न्हय, अशे तरेचो थाराव मंजूर करून लेगीत पंचायतीन त्या थारावाची कार्यवाही करिनासतना तो थाराव कोयराच्या बल्लांत उडोवन, 17 वेर पंचायत मंडळाची बसका जाली ते बसकेंत वट्ट पंचायत वाठारांत 90 व्हिलांक परवानगी दिवपी थाराव मंजूर केलो.
ह्या थारावाक ग्रामस्थांचो खर विरोध आसा. हो थाराव नामंजूर करचो. हे खातीर जागृत नागरीक व्हड संख्येन आयज (सोमारा) दनपारां साडेबारा वरांचेर मांद्रें पंचायत कचेरेंत सरपंच आनी पंचायत सचिवांची भेट घेवन तांकां जाप विचारतले.
खंयच्या वाठारांत खंय आनी कितल्या व्हिलांक परवानगी दिल्या. थंय दोंगर आसात? ती सपाट सुवात आसा? ती शेत जमीन आसा? वा थंय लोकवस्ती आसा? त्या वाठाराची पुराय म्हायती पंचायत मंडळान दिवची हे खातीर जागृत ग्रामस्थ, पंचायत मंडळाची, पंचायत सचिवाची भेट घतले अशी म्हायती अॅड. प्रसाद शहापूरकार हांणी दिली.
काल (शुक्रारा) जागृत ग्रामस्थांची एक म्हत्वाची बसका पंचायत कचेरी वाठारांत जाली. त्या वेळार सगल्यांचे संमतीन थारावूय मंजूर करून 17 वेर व्हिलांक दिल्ली परवानगी तशेंच हाचे पयलीं दिल्ली परवानगी रद्द थारावची हे खातीर भेट घेतले अशी म्हायती शहापूरकार हांणी दिली.
तांणी मुखार उलयतना सांगलें, 17 वेर पंचायत मंडळाची एक बसका जावन वट्ट 90 व्हिलांक परवानगी दिल्ल्याची बातमी सोशल मिडियाचेर व्हायरल जाले उपरांत कांय जागृत नागरिकांनी तिडक उक्तायली. हाचे आड आवाज उठोवपा खातीर वेगळ्या वेगळ्या सोशल मिडिया माध्यमांतल्यान संदेश प्रसारीत केले आनी काल सांजवेळा म्हत्वाची बसका जाली. हे बसकेंत ग्रामस्थांचे परवानगे बगर कसलेच तरेचे परवाने पंचायत मंडळांनी दिवचे न्हय अशें थारलें अशें शहापूरकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
