भांगरभूंय | प्रतिनिधी
पणजीः फाटल्या कांय दिसांनी गोंयांत दर्यांत, न्हंयेंत वा हेर उदकाच्या सुवातांचेर कुडी सांपडपाचें प्रमाण वाडलां. गोंयांत जानेवारी ते सप्टेंबर ह्या 9 म्हयन्यांच्या काळांत 67 जाणांक बुडून मरण आयलां. तातूंत आत्महत्या केल्ल्या मनशांचोय आस्पाव आसा. ह्या काळांत सगळ्यांत चड 10 घडणुको पणजी आनी भोंवतणच्या वाठारांतल्यो आसात. उजो पालोवपी दळा कडल्यान ही म्हायती मेळ्ळ्या.
मेळिल्ले म्हायती प्रमाण वयल्या काळांत उजो पालोवपी दळाक बुडपाच्या घडणुकां विशीं 108 कॉल आयिल्ले. तातूंत 67 जाणांक बुडून मरण आयलें जाल्यार 4 जाणांक वाटावपाक येस आयलें. तशेंच हे मजगतीं उदकांक पडिल्ल्या 4 जनावरांक वाटावपाक दळाक येस आयिल्लें. दळाक आयिल्ल्या वट्ट कॉलांत पणजे उपरांत पोरणें गोंय, मडगांव आनी सांवड्डेंच्यान कॉल आयिल्ले. ह्या वाठारांतल्यान बुडपा संबंदांत दरेकी 5 कॉल आयिल्ले. ते उपरांत लोटली, मुळगांव, केपें वाठारांत बुडून मरण येवपाच्यो दरेकी 4 घडणुको घडल्यात. चिंचणी, म्हापशें, पेन्ह द फ्रांक आनी ताळगांवां दरेकी 3 घडणुको घडल्यो. जाल्यार हणजूणें, असोळणें, कळंगूटे, काणकोण, कुडटरी, कांदोली, करमळी, दुर्भाट, शिरदोण, गांजे वाठारांत बुडून मरण येवपाच्यो दरेकी 2 घडणुकांची नोंद जाल्या. फेब्रुवारी ते मे ह्या गिमाच्या म्हयन्यांनी पेवपाक गेल्ल्या 27 जाणांक बुडून मरण आयिल्लें.
आपत्कालीन परिस्थितींत 86 जाणांक मरण
जानेवारी ते सप्टेंबर ह्या काळांत गोंयांत विवीध आपत्कालीन परिस्थितींत 86 जाणांक मरण आयिल्लें. तातूंतले 67 म्हणल्यार 77 टक्के मरण हें बुडून आयिल्ले. वयल्या काळांत उजो पालोवपी दळाक 405 जाणांक जाल्यार 543 जनावरांक वाटावपाक येस आयलां, अशी म्हायती मेळ्ळ्या.
सप्टेंबरांत चड जाणांक मरण
फाटल्या 9 म्हयन्यांत सप्टेंबरांत सगळ्यांत चड 13 जाणांक बुडून मरण आयिल्लें. ते उपरांत जुलयांत 11, ऑगस्ट आनी मे म्हयन्यांत दरेकी 9, एप्रीलांत 8, फेब्रुवारींत 6 जून आनी मार्चांत दरेकी 4 जाल्यार जानेवारींत 3 जाणांक बुडून मरण आयिल्लें, अशी म्हायती उजो पालोवपी दळा कडल्यान मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
