भांगरभूंय | प्रतिनिधी
नवी दिल्ली, खबरां संस्था ः फाटल्या कांय दिसां सावन सायबर गुन्यांवकार नव्यो नव्यो पद्दती आपणावन लोकांची फटवणूक करतात. सायबर गुन्यांवकार कायदे आनी नेमांचो भंय घालून लोकांची घडवणूक करतात. हाका ‘डिजिटल अरेस्ट’ अशें म्हण्टात.
विशेश म्हळ्यार 2024 वर्साच्या पयल्या 9 म्हयन्यांत सायबर फटवणुकेक लागून भारताक सुमार 11,333 कोटी रुपयांचें लुकसाण जालां. गृह मंत्रालयाच्या (MHA) भारतीय सायबर क्रायम कोऑर्डिनेशन सेंटर (I4C) ह्या विभागान एकठांय केल्ल्या आंकडेवारींतल्यान ही धक्को दिवपी म्हायती मेळ्ळ्या.
हांतूत स्टॉक ट्रेडिंगांत सगळ्यांत चड म्हळ्यार 4,636 कोटी रुपयांची फटवणूक जाल्या. हें विशीं 2,28,094 कागाळी आयल्ल्यो. जाल्यार गुंतवणूक फटवणुकेच्या 1,00,360 कागाळीतल्यान 3,216 कोटी रुपयांचें लुकसाण जालां. जाल्यार ‘डिजिटल अरेस्ट’ संबंदीत 63,481 कागाळींक लागून 1,616 कोटी रुपयांचें लुकसाण जालां.
द इंडियन एक्सप्रेसाच्या अहवाला प्रमाण सिटीजन फायनान्शियल सायबर फ्रॉड रिपोर्टिंग अँड मॅनेजमेंट सिस्टम (CFCFRMS) च्या आंकडेवारीं प्रमाण 2024 वर्सा सुमार 12 लाख सायबर फटवणूक कागाळी नोंद जाल्यात. तशेंच 2021 वर्सा सावन सीएफसीएफआरएमएसांत 30.05 लाख कागाळी नोंद जाल्यात. तातूंत 27,914 कोटी रुपयांचें लुकसाण जालां. तातूंतल्यो 11,31,221 कागाळी 2023 वर्सा नोंद केल्ल्यो, 514,741 कागाळी 2022 वर्सा आनी 1,35,242 कागाळी 2021 वर्सा नोंद जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
