भांगरभूंय | प्रतिनिधी
नवी दिल्ली,खबरां संस्था ः भारतांतल्या 81% तरणाट्यांक देशभक्तीची भावना आसा पूण राजकी पक्ष आनी फुडाऱ्यांचेर तांचो विस्वास ना. जाल्यार 31% लोक वैयक्तीक अस्मितायेक चड म्हत्व दितात. व्हॉयस फॉर इन्क्लूजन, बिलाँगिंग अँड एम्पॉवरमेंट (VIBE) आनी प्रोजेक्ट पोटेंशियलाच्या अहवालांतल्यान ही म्हायती मेळ्ळ्यां.
2024 वर्सांचे लोकसभा वेंचणुकेंत मतदान करूंक नाशिल्ल्याचें कारण घरांतल्यान पयस रावप अशें 43% तरणाट्यांनी सांगलें. देशांतले 29% तरणाटे राजकारणा पासून पुरायपणान पयस आसात. 26% लोक खंयच्याच पक्षा कडेन संबंदीत नासतना लेगीत राजकी चर्चेत वांटो घेतात. फकत 11% लोक खंयच्याय पक्षाचे वांगडी आसात. भारतीय तरणाटे ल्हवू ल्हवू राजकारणा पसून पयस वचत आसात हें ह्या अहवालांतल्यान दिसून येता.
व्हायबान (VIBE) तयार केल्लो हो अहवाल 4,972 तरणाट्यांच्या सर्वेक्षणाचेर आदारीत आसा. जून-ऑगस्ट 2024 ह्या काळांत हें सर्वेक्षण केल्लें.
49% तरणाटे समाजसेवेचो उपक्रम सुरू करपाक सोदतात, पूण 58% तरणाट्यांक निधीचो उणाव आसा आनी 39% तरणाट्यांक योग्य मार्गदर्शन ना. तरणाटे पारंपरीक राजकारणा परस मुद्यांचेर आदारीत गजालींक चड प्राधान्य दितात. पर्यावरण, लैंगिक समानताय, शिक्षण, बेरोजगारी ह्या सारक्या मुद्यांचेर ते चड सक्रीय आसात. भारताचे तरणाटे आतां फकत मतदारच न्हय, तांकां धोरण तयार करपाच्या कामांत वांटो घेवपाची इत्सा आसा अशें ह्या अहवालांतल्यान दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
