भांगरभूंय | प्रतिनिधी
भारतांत रावपी दरेका भारतीय नागरिकाक खंयच्याय राज्यांत वचून नोकरी करपाचो अधिकार आसा. कांय राज्यांनी जमीन मालमत्ता घेवपाक मेळना. थोडे कडेन सरकारी नोकरी मेळना. कारण थंय अमूक वर्सां रावपाची अट आसता. थंयची भास येवपाक जाय. मात, खाजगी नोकरी, वेवसाय, धंदो करपाक कसलें बंधन ना. खंयूय वचपाचे आनी थंयच्या लोकां मदीं मेळून मिसळून, माये मोगान रावपाचें. तांची मानसिकताय, भास, खाण, मुस्तायकी, सण- परबो मना पसून स्विकारपाच्यो आनी दुदांत साकर विरघळटा, तशें थळाव्यां मदीं एकरूप जावपाचें. मात, सगल्याच राज्यांनी हें जाताच अशें ना. ताका लागून वा सगलेच कडेन भायले दिसपाक लागले वा तांकां सरकारी नोकऱ्यो मेळपाक लागल्यो काय थळावे तिडकतात. मागीर एक दीस कसलेंय निमित्त पळोवन ते हिंसक जातात आनी भायले- भितरले ह्या वादाची कीट पडटा. मुंबय हें हाचें बरें उदाहरण. दक्षीण भारतीय सरकारी नोकऱ्यांनी, हेर कडेन दिसपाक लागले तेन्ना मुंबय शिवसेनेन तांचे आड मोहीम सुरू केली. शिवसेने पसून फुटून वेगळ्या जाल्ल्या राजकी वावुरप्यांनी (मनसे) हालींच्या वर्सांनी युपी- बिहाराच्या भय्यां आड आंदोलन केल्लें. देखून कसलेय नोकरेंत पयलीं थळाव्यांक प्राधान्य दिवपाक जाय, असो सूर फाटल्या बऱ्याच वर्सां सावन जायते जाण आळयत आसात. कांय सरकारांनीय तो मानून घेतला, पूण हें प्राधान्य दिवप जाताच अशें ना!
गोंयकारांक 80 टक्के नोकऱ्यो आरक्षीत दवरपाची मागणी गोवा फाॅरवर्डाचे आमदार विजय सरदेसाय हांणी केल्या. तशी तरतूद सरकारान करची म्हूण ते गोंय राज्य थळाव्यांक रोजगार विधेयक येता त्या विधानसभा अधिवेशनांत मांडटले. अशीच मागणी रिव्होल्युशनरी गोवन्स पक्ष सुरवेक सावन करता. ते बाबतींत ते बरेच आक्रमकूय आसात. हाचे पयलीं जायत्या आमदारांनी, पक्षांनी अशीच मागणी केल्या. भुमिपुत्रांक पयलें प्राधान्य. पूण हें पुरायपणान प्रत्यक्षांत आयलांच अशें ना. गोंयांत वाडपी परप्रांतीयांचो आंकडो पळयल्यार हें कोणूय सांगतलो. तातूंत गोंयांत 25, 30 वर्सां सावन स्थायीक जाल्ल्यांच्या भुरग्यांक सरकारी नोकऱ्यो मेळ्ळ्यात. त्यो कोणे दिल्यात तें सगळ्यांक खबर आसा. गोंयांत जल्मल्लीं, शिकिल्लीं हीं भुरगीं. मागीर तांकां नोकरी दिवप काय ना, हो यक्ष प्रस्न. तरीय गोंयांत आयले बराबर 10 वर्सां भितरूय नोकरी मेळोवपी आसतले!! बाजारपेठ आनी बऱ्याच ल्हान वेवसायांनी भायल्यांचो शेक दिसता. कांय जाणांचें राहणिमान सादें आसलें तरी तांचे कडेन लाखांनी दुडूय जाला. कारण कांय वेवसायांनी (देखीक खाणां- जेवणां) झटपट पयसो मेळटा. फक्त कश्ट करपाची तयारी जाय. हे भायले वेवसायीक मागीर आपल्या घरच्यांक, सोयऱ्यांक हाडटात आनी अशे तरेन तांची संख्या वाडतूच वता. थळाव्या लोकांनी सोडिल्ले वेवसाय, धंदे हे भायले कायदेशीर मार्गान करतात आनी भितरल्यां परस खूब फुडें वतात. मागीर दुस्वास, तिडक आनी भायले- भितरलो संघर्श! हें जावपाक राजकी मळूच जापसालदार आसा. ते येतकच मतां खातीर तांकां स्थायीक जावपाक सगली मजत करप, मदीं तांच्या नांवांन आरड मारिल्ले सारकी करप. भायल्यान विरोध भितरल्यान तेंको दिवप, जो मेरेन जमता तो मेरेन तांकां पोसप. फक्त मतां खातीर!! सगले कडेन हें चित्र दिसता.
गोंयांतल्या उद्देगीक वसणुकांतल्या खंयच्या कारखान्यांत कितले गोंयकार काम करतात, ताची म्हायती दिवची अशी मागणी फाटीं जाताली. ही म्हायती कामगार खात्या कडेन आसपाक जाय. प्रोव्हीडंट फंड खात्याकूय खबर आसतलें. मुळांत गोंयांत कांय कारखाने आसात, थंयचें काम गोंयकारांक जमपा सारकें ना. ताका लागून भायल्यान कामगार हाडचे पडटात. गोंयकार तरणाटे प्रामाणीकपान काम करतात. संप करिनात. तांची कसलीच कटकट आसना. तेन्ना गोंयच्या उद्देगांनी चडांत चड गोंयकाराक प्राधान्य दिवपाक जाय, अशें मत फाटीं गोंय उद्देगीक संघटणेच्या आदल्या अध्यक्षान उक्तायिल्ले. कारखान्यांतलो अधिकारी परप्रांतीय आसलो काय तो आपल्या राज्यांतले कामगार हाडटा. मागीर एका फाटोफाट एक येत रावतात. गोंयचे तरणाटे आदले उरूंक नात. फाटल्या कांय वर्सांनी हाताक मेळटा तें काम करपाची गोंयकार तरणाट्याची तयारी आशिल्ली पळोवंक मेळटा. तेन्ना तांकां कुशळटाय प्रशिक्षण दिवन रोजगाराच्या मळाचेर ताठ उबो रावपा खातीर तयार करपाक जाय. मजूर खात्यान खंयचे कारखाने, वेवसाय गोंयकारांक घेनात, ताचेर लक्ष दवरपाक जाय. गोवा फाॅरवर्ड विधेयक हाडटा खरें, पूण तें चालीक लागतलें हे खातीर सगल्यांनीच वावुरचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
