भांगरभूंय | प्रतिनिधी
नवी दिल्ली, खबरां संस्था ः अंदूं 75 वो प्रजासत्ताक दीस व्हडा उमेदीन देशभरांत मनयलो. हे फाटभुंयेर केंद्र सरकारान अंदूं 26 जानेवारीक, 75 व्या प्रजासत्ताक दिसा 75 रुपयांचें खाशेलें नाणें जारी केलें.
75 रुपयांच्या ह्या खाशेल्या नाण्याचें वजन 40 ग्राम आसा अशें नामनेचे नाणेतज्ज्ञ सुधीर लुनावत हांणी सांगलें. हें नाणे शुद्ध रुप्या पसून तयार केलां. ह्या नाण्याचे एके वटेन 75 रुपया मोल बरयलां आनी दुसरे वटेन नव्या आनी पोरन्या संसद इमारतीचें चित्र आसा. तशेंच ह्या नाण्याचेर 2024 वर्साचो उल्लेख आनी 75 वो प्रजासत्ताक दीस अशें हिंदी आनी इंग्लीश भाशेंत बरयल्लें आसा. 75 रुपयाचें हें खाशेलें नाणें केंद्र सरकाराच्या मुंबय टांकसाळींत तयार केलां. ह्या खाशेल्या नाण्याचेर अशोक स्तंभाची प्रतिमा, सत्यमेव जयते, जाल्यार इंग्लीशींत इंडिया आनी हिंदींत भारत अशें बरयल्लें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
