भांगरभूंय | प्रतिनिधी
मतदारसंघातले प्रस्न सुटावे करपाक कायदो हातांत घेवपाची तयारी
पणजी : पयशे नाशिल्ल्यान वा भिरांतीक लागून 75 ते 80 मुंडकार हक्का खातीर खटले दाखल करपाक पळयनात. हाका लागून मुंडकार खटले सुटावे जाले तरी मुंडकारांचे प्रस्न सुटावे जावप कठीण आसा. मुख्यमंत्री डॉ. प्रमोद सावंत हे मुंडकारांचे प्रस्न सुटावे करतले असो विस्वास मांद्रेंचे आमदार जीत आरोलकार हांणी उक्तायलो.
प्रुडंट मिडियाच्या हेड ऑन मुलाखतींत ते उलयताले. प्रुडंट मिडियाचे संपादक संचालक प्रमोद आचार्य हांणी तांची मुलाखत घेतली.
दर्यादेग वाठारांत मुंडकारांचे प्रश्न चड आसात. मांद्रें मतदारसंघात मुंडकारांची समस्या जटील आसा. भाटकार मुंबय वा दिल्लीत रावतात. मुंडकारां कडेन तांचो संपर्क येना. खटले दाखल जाले उपरांत ते आदोगादा वतीन खटले चलयतात. एनओसी मागची कशी आनी कोणा कडेन? असो प्रस्न येता. भाटकारान बिल्डराक जागो विकलो जाल्यार बावन्सर घालून तो मुंडकाराक काडपाचो यत्न करतात, अशी सध्या दर्यादेग वाठारातल्या मुंडकारांची स्थिती आसा. विधानसभेंत तशेंच हेर कडेन मुंडकारांच्या प्रस्नाचेर हांवें आवाज उठयला. मुख्यमंत्री डॉ. प्रमोद सावंत हांणी मुंडकारांचे खटले निकालांत काडपाचे यत्न सुरू केल्यात. शेनवारा लेगीत मामलेदार सुनावण्यो घेवपाक लागल्यात. मुंडकार कायद्याची कार्यवाय जावन तांकां न्याय दिवपाची गरज आसा. हाचे खातीर कायदो लेगीत हातांत घेवपाची म्हजी तयारी आसा, अशें जीत आरोलकार हांणी सांगलें. मुंडकारांचो प्रस्न आसूं वा हेर प्रस्न आसू महाराष्ट्रवादी गोमंतक पक्षान म्हाका केन्नाच तेंको दिवंक ना. बऱ्या कामा खातीर तोखणाय वा मार्गदर्शन लेगीत कोणे करूंक ना. विधानसभा वेंचणूक 2027 वर्सा जातली. तेन्नाच वेंचणूक लडोपा विशींचो निर्णय हांव घेतलों अशें तांणी सांगलें.
मोपा विमानतळाक लागून पेडणें म्हालाक लाव जाला तशें लुकसाणूय जालां. विमानतळाक लागून रस्ते तशेच मुळाव्यो सुविधा तयार जाल्यात. मात जमीन विक्रीचें प्रमाण वाडलां. उदरगत जाय आसली तरी जमीन विक्री वा जमनीचे रुपांतरण व्हड प्रमाणांत जावपाक हांव दिवचो ना. मेगा प्रकल्पांक म्हजो विरोध आसतलो. जमीन रुपांतरणाचें प्रमाण वाडपाक जायना, अशी मागणी हांवें मुख्यमंत्री डॉ. प्रमोद सावंत हांचे लागीं केल्या अशें आरोलकार हांणी सांगलें.
राज्याचे फुडारी डॉ. प्रमोद सावंत
जाल्यार पक्षाचे फुडारी सुदिन ढवळीकार
सरकार वा राज्य म्हूण विचार करीत जाल्यार मुख्यमंत्री डॉ. प्रमोद सावंत हे म्हजे फुडारी आसात. पक्षाचो विचार करीत जाल्यार मंत्री सुदिन ढवळीकार हे म्हजे फुडारी आसात. येता त्या वेंचणुके विशीं 2027 वर्सा हांव निर्णय घेतलों. मगो पक्ष वा पक्षाचे फुडारी सुदिन ढवळीकार हांचे विशीं म्हाका आदर आसा अशें जीत आरोलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
