भांगरभूंय | प्रतिनिधी
भांगरभूंय । प्रतिनिधी
पणजीः गोंयांतले सरासरी 73 टक्के दोतोर सोरो पियेतात. फाटल्या 3 म्हयन्यांत केन्ना ना केन्ना तांणी सोरो पियेला, असो निश्कर्श दोतोरांच्या सर्वेक्षणांत उक्तायला. तशेंच सरासरी 61 टक्के दोतोरांचेर कामाचो खूब ताण आसता. 55 टक्के दोतोर कामाचे स्थितीचेर समाधानी आसात, असो अहवालांतलो निश्कर्श आसा.
भारतीय वैजकी संघटणेच्या गोंय फांट्यान सांगात (एनजीओ), गोवा इन्स्टिट्यूट ऑफ मॅनेजमेंट (जीम) हांचे कडल्यान हें सर्वेक्षण केलां. सर्वेक्षणांतल्या अहवालांतले हे निश्कर्श आसात. आयएमएचे वांगडी आशिल्ल्या 319 दोतोरांक प्रस्न विचारून हो सर्वे केला.
दोतोरां मदीं लेगीत सोरो पियेवपाचें प्रमाण खुबूच चड आसा. 73 टक्के दोतोरांक सोरो पियेवपाची सवंय आसा. फाटल्या 3 म्हयन्यांत केन्ना ना केन्ना तरी तांणी सोरो पियेला. 27 टक्के दोतोरांनी फाटल्या 3 म्हयन्यांत केन्नाच सोरो पियेवंक ना. ही स्थिती फाटल्या 3 म्हयन्यांतली आसा. हातूंतले 5 टक्के दोतोर खूब सोरो पियेतात. तांचे सोरो पियप हे तांचे खातीर धोकादायक थारपाक शकता.
दोतोर उणें आनी दुयेंतीं चड, अशी स्थिती खूबश्या हॉस्पिटलांनी आसा. 61.6 टक्के दोतोरांचेर कामाचो खूब ताण (बर्नआउट) आसता. उरिल्या 38.4 टक्के दोतोरांचेर कामाचो ताण नासता. तशेंच 55.7 टक्के दोतोर कामाचे स्थिती विशीं समाधानी आसात. 44.3 टक्के दोतोरांक कामाचें समाधान मेळना.
दोतोरांचेर येवपी ताणाची तरेकवार कारणां आसात. काम चड पडप, कामाचीं वरां चड आसप, कामाच्या थळा वयली स्थिती सारकी नासप, हीं कांय कारणां आसा. ते भायर सहकाऱ्यां कडल्यान सहकार्य नासप, कामाच्या थळाचेर सतावणूक जावप, कामाचें स्वरूप स्पश्ट नासप, उणो पगार, नोकरेची सुरक्षा नासप हीं लेगीत ताणां फाटलीं कारणां आसात. ह्या कारणांचें प्रमाण लेगीत सर्वेक्षणांत आसा.
दोतोरांचे शिक्षणीक पात्रतायेचो विचार केलो जाल्यार 97.8 टक्के दोतोर एमबीबीएस पदवीधारक आसात. 1.1 टक्के दोतोर पदुव्यत्तर वा स्पेशालिस्ट आसात. तशेंच 71 टक्के दोतोर खासगी प्रॅक्टीस वा खासगी हॉस्पिटलांनी वावर करतात. तेचवरी 6 टक्के दोतोर आंकवार आसात. सर्वेक्षणांत वांटो घेतिल्ल्या दोतोरांची सरासरी पिराय 48.3 वर्सां आसा. तशेंच सर्वेक्षणांत वांटो घेतिल्ल्यो 59 टक्के बायलां दोतोर आसात. हातूंत चडशें जाण लग्न जाल्ले दोतोर आसात. तशेंच दोतोरांचो सरासरी अणभव 21.9 वर्सांचो आसा. तशेंच 45 टक्के दोतोर ओपीडी (आवट पेशेंट) तशेंच आयपीडी (इनपेशंट) हांचेर उपचार करतात. 26 टक्के दोतोर फक्त ओपीडी दुयेंतींचेर उपचार करतात. 29 टक्के दोतोर फक्त आयपीडी (हॉस्पिटलांत अॅडमिट) दुयेतींचेर उपचार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
