भांगरभूंय | प्रतिनिधी
समग्र शिक्षा अभियान अधिकाऱ्यांची म्हायती
मुलाखती घेवन निवड प्रक्रिया पुराय
अर्थ खात्याचे मान्यतायेची पळयतात वाट
भांगरभूंय । प्रतिनिधी
पणजी : समग्र शिक्षा अभियाना खाला 700 कंत्राटी शिक्षकांक रुजू करून घेवपाक अर्थ खात्यान अजून मान्यताय दिवंक नाशिल्ल्यान तांची भरती आडावल्या. मुलाखती घेवन शिक्षकांची निवड करपाची प्रक्रिया समग्र शिक्षा अभियानान पुराय केल्या. अर्थ खात्यान मान्यताय दिवंक नाशिल्ल्यान नेमणुकीचीं पत्रां दिवप शक्य जायना, अशी म्हायती समग्र शिक्षा अभियानाच्या अधिकाऱ्या कडल्यान मेळ्ळी.
गोंयांत आतां राष्ट्रीय शिक्षण धोरणाची कार्यवाही सुरू जाल्या. शिक्षकांचो उणाव पयस करपा खातीर राज्य शिक्षण संशोधन आनी प्रशिक्षण मंडळान (एससीईआरटी) समग्र शिक्षा अभियाना खाला 700 शिक्षकांची भरती करपाचो निर्णय घेतला. ह्या पदां खातीर अभियानान 21 मे 2025 ह्या दिसा जायरात दिल्ली. पात्र आनी इत्सूक उमेदवारांच्यो थेट मुलाखती घेतल्यो. 26 मे ते 30 मे ह्या काळांत मुलाखती जाल्यो. मुलाखती वेळारूच प्रमाणपत्रांची तपासणी जाली. मुलाखतीचे सोपस्कार पुराय जाले उपरांत समग्र शिक्षा अभियानान निवड जाल्ल्या उमेदवारांची वळेरी तयार केली. ही सगली प्रक्रिया जुलयांत पुराय जाल्या. मात अर्थ खात्याची मान्यताय मेळूंक नाशिल्ल्यान शिक्षकांच्यो नेमणुको जावंक ना, अशी म्हायती समग्र शिक्षा अभियानाचे मुखेली शंभू घाडी हांणी दिली.
हीं सगलीं पदां कंत्राटी पद्दतीचेर आसात. शिक्षकांक म्हयन्याक 20 हजार रुपयांचो पगार मेळटलो. तशेंच ही नेमणूक एका वर्सा खातीर आसतली. वट्ट 700 पदांतलीं 371 पदां सर्वसामान्य गटा खातीर आसात. हेर सगलीं पदां राखीव आसात. अनुसूचीत जाती (एससी) खातीर 14 पदां, अनुसूचीत जमाती खातीर (एसटी) 84, हेर मागास वर्गीयां खातीर 189, दिव्यांगा खातीर 35, एक्स सर्वीसमॅन गटांत 7 पदां राखीव आसात. शिक्षकां खातीर बारावी पास जावपा सयत डी.एड ही उण्यांत उणी पात्रता आसा. तशेंच कोंकणीचे गिन्यान सक्तीचें आसा. ह्या 700 पदां खातीर 3 हजारां वयर उमेदवारांनी मुलाखती दिल्यो. मुलाखती जावन तीन म्हयने जावन गेले आसले तरी अजून नियुक्ती जावंक नाशिल्ल्यान इत्सूक उमेदवारां मदीं निरशेवणी निर्माण जाल्या.
ज्या मुळाव्या शाळांनी शिक्षकांचो उणाव आसा त्या शाळांनी या कंत्राटी शिक्षकांची नियुक्ती करपाची येवजण आशल्ली. मात शिक्षणीक वर्स सुरू जावन चार म्हयने जाले. अजून नेमणूक जावंक नाशिल्ल्यान शिक्षकांची वेवस्था करप शिक्षण खात्याक शक्य जावंक ना.
आतां शिक्षकांची भरती कर्मचारी भरती आयोगा वतीन करची पडटा. आयोगान शिक्षकांचे भरती खातीर जायरात दिवन अर्ज घेतल्यात. परिक्षा जावन नेमणूक जाता म्हणासर बरोच उशीर लागतलो. तो मेरेन सर्व शिक्षा अभियाना खाला कंत्राटी शिक्षकांची वेवस्था करपाची येवजण आशिल्ली. मात ह्या शिक्षकांची नेमणूक करप लेगीत शिक्षण खात्याक शक्य जायना. मुळाव्या 700 शिक्षकां भायर 149 संगीत, फायन आर्ट तशेंच एनएसक्यूएफ इन्स्ट्रक्टर पदां भरपा खातीर लेगीत सर्व शिक्षा अभियानान जायरात दिल्ली. हांची लेगीत नेमणूक जावपाची आसा. ह्या पदां खातीर त्या- त्या विशयांत पदवीची पात्रताय अट आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
