भांगरभूंय | प्रतिनिधी
फाटल्या दोन जिल्हो पंचायत वेंचणुकेचे मोडले विक्रम
मतदानाची प्रक्रिया शांतिकायेन आनी सुरळीत
लांटबार्से सगल्यांत चड, नावेली सगल्यांत उणें मतदान
भांगरभूंय । प्रतिनिधी
पणजी : गोंयांत जिल्हो पंचायतीचे वेंचणुके खातीर रिकोर्ड ब्रेकींग मतदान जालें. वेंचणूक सोंपले उपरांत 70.81 टक्के मतदानाची नोंद जाली. दिवचलच्या लांटबार्से मतदारसंघांत सगल्यांत चड 88.29 टक्के जाल्यार साश्टींतल्या नावेली मतदारसंघांत सगल्यांत उणें 55.29 टक्के मतदान जालें.
सगल्या वाठारांनी आतां मेरेन मतदानाची प्रक्रिया शांतिकायेन आनी सुरळीत जाली. खंयसरूच कायदो आनी सुवेवस्था इबाडपाचो प्रस्न येवंक ना. सकाळीं मतदानाची प्रक्रिया कांसवा गतीन चलताली, पूण दनपार उपरांत मतदाना खातीर व्हडा प्रमाणांत गर्दी पळोवपाक मेळ्ळी. अंदूंच्या जिल्हो पंचायत वेंचणुकेंत फाटल्या दोन जिल्हो पंचायत वेंचणुकेचे विक्रम मोडल्यात. 2015 त 66.43 टक्के आनी 2020 त 56.83 टक्केच्या तुळेंत चड मतदान हे खेपेचे वेंचणुकेंत जालां.
गोंयांतल्या 50 जिल्हो पंचायत मतदारसंघांनी 1284 पोलींग बुथांनी मतदानाक सुरवात जाली. वेंचणूक सोंपले उपरांत 8,68,637 मतदारा मदल्या 6,15,581 मतदारांनी मतदानाचो हक्क वापरून 70.81 टक्के मतदानाची नोंद केली. हातूंत 2,95,720 दादले मतदार जाल्यार 3,19,859 बायलां मतदारांचो आस्पाव आसा. जाल्यार 2 तृतीयपंथी मतदारांचो आस्पाव आसा. उत्तर गोंयच्या 25 मतदारसंघांनी 72.66 टक्के जाल्यार दक्षीण गोंयच्या 25 मतदारसंघांनी 68.93 टक्के मतदान जालें.
उत्तर गोंयच्या हरमल मतदारसंघांत 80.43 टक्के मतदान जालें, मोरजी 72.59 टक्के, धारगळ 76.40 टक्के, तोरशें 76.02 टक्के, शिवोली 69.12 टक्के, कोलवाळ 76.09 टक्के, हळदोणें 66.49, शिरसय 65.88 टक्के, हणजूणें 72.67 टक्के, कळंगूटे 66.87 टक्के, सुकूर 64.93 टक्के, रेईश मागूश 64.74 टक्के, पेन्ह द फ्रान्का 64.32 टक्के, सांताक्रुझ 64.98 टक्के, ताळगांव 59.44 टक्के, चिंबल 66.78 टक्के, खोर्ली 68.46 टक्के, सेंट लोरेन्स 63.98 टक्के, लांटबार्से 88.29 टक्के, कारापूर- सर्वेण 79.40 टक्के, मयें 79.69 टक्के, पाळी 86.58 टक्के, होंडा 85.53 टक्के, केरी 87.99 टक्के आनी नगरगांव 86.71 टक्के मतदान जालें.
दक्षीण गोंयच्या उसगांव- गांजे मतदारसंघांत 82.84 टक्के, बेतकी खांडोळें 81.32 टक्के, कुट्टी 74.67 टक्के, वेळींग- प्रियोळ 73.23 टक्के, कवळें 68.63 टक्के, बोरी 72.83 टक्के, शिरोडें 73.49 टक्के, राय 59.23 टक्के, नुवें 62.72 टक्के, कोलवा 59.97 टक्के, वेळ्ळी 56.52 टक्के, बाणावली 59.70 टक्के, दवर्ली 65.78 टक्के, गिरदोळी 70.75 टक्के, कु़डटरी 60.26 टक्के, नावेली 55.29 टक्के, सांवड्डें 79.21 टक्के, धारबांदोडें 78.79 टक्के, रिवण 78.98 टक्के, शेल्डें 72.57 टक्के, बार्से 80.19 टक्के, खोला 73.77 टक्के, पैंगीण 76.36 टक्के, सांकवाळ 63.99 टक्के आनी कुठ्ठाळी 56.96 टक्के मतदान जालें.
सकाळच्या परस सांजे मतदानाक गती
सकाळीं फुडें मतदान कांसवा गतीन सुरू जालें. सकाळी 8 ते 12 वरां मजगतीं मतदान करपाक खूब उणो प्रतिसाद मेळ्ळो. पूण दनपारां 2 वरा उपरांत लोक घरांतल्यान भायर सरले आनी मतदार केंद्राचेर लोकांची गर्दी पळोवपाक मेळ्ळी. सकाळीं 8 ते 10 वरां मजगतीं 15.11 टक्के मतदान जालें, दनपारां 12 वरां उपरांत ही टक्केवारी 32.58 टक्के मेरेन पावली, दनपारां 2 वरा उपरांत 48.76 टक्के मेरेन पावली आनी सांजे 4 वरां उपरांत 63.59 टक्के मतदान जावन सांजे पांचांक वेंचणूक सोंपले उपरांत वट्ट मतदान 70.81 टक्के मेरेन पावलें.
फाल्यां 15 केंद्रांचेर मतमेजणी
उत्तर गोंयांत 111 जाल्यार दक्षीण गोंयांत 115 उमेदवारांक मतदारांनी आपलो कौल दिलो. ह्या 226 उमेदवारांचो फुडार मतपेटींत सील जाला आनी खंयच्या उमेदवाराच्या गळ्यांत जैताची माळ पडटली हें सोमारा 22 डिसेंबराक निश्चीत जातलें. ह्या 50 मतदारसंघांची मतमोजणी सकाळीं 8 वरांचेर 15 मतमोजणी केंद्रांनी जातली.
मतमेजणी केंद्र आनी मतदारसंघ
भोवउद्देशी खेळां संकूल- हरमल, मोरजी, धारगळ, तोरशें
बॉक्सींग हॉल पेडे खेळां संकूल- शिवोली, कोलवाळ, हळदोणें, शिरसय, हणजूणें
बॅडमिंटन हॉल पेडे खेळां संकूल- कळंगूट, सुकूर, पेन्ह- द- फ्रान्का, रेईश मागूश
श्यामाप्रसाद मुखर्जी स्टेडियम- सांताक्रुझ, ताळगांव, चिंबल, खोर्ली, सेंट लोरेन्स
नारायण झांट्ये हॉल दिवचल- लांटबार्से, कारापूर-सर्वण, मयें, पाळी
कदंब बस स्टॅण्ड हॉल वाळपय- होंडा, केरी, नगरगांव
आटीआय फर्मागुडी- उसगांव- गांजे, बेतकी- खांडोळें, कुट्टी, वेलींग- प्रियोळ
आयटीआय फर्मागुडी- कवळें, बोरी, शिरोडें
माथानी साल्ढाणा संकूल- राय, नुवें, कोलवा, वेळ्ळी, बाणावली
सरकारी कचेरी संकूल धारबांदोडें- सांवड्डें, धारबांदोडें
सांगें सरकारी खेळां संकूल- रिवण
केपें सरकारी खेळा संकूल- शेल्डें, बार्से
सरकारी उच्च माध्यमीक विद्यालय काणकोण- खोला, पैंगीण
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
